გადაცემა ახალი კვირის ყოფილი წამყვანის, იმედა დარსალიას განცხადებით, საზოგადოებრივ მაუწყებელში იყო შავი სიები, ანუ იმ ადამიანების ჩამონათვალი, თუ ვინ უნდა ჩაწეროს ჟურნალისტმა და ვინ არა.

"იყო სხვადასხვა მიმართულების თემების დაბლოკვა, იყო შავ სიებთან დაკავშირებით, ამას პირველად ვამბობ ახლა, თუმცა არ გავაგრძელებ ამაზე საუბარს. სასამართლომდე მივალთ ჩვენ აუცილებლად და სასამართლოზე ვილაპარაკებ ყველა დეტალზე საერთოდ... შავი სიები ნიშნავს ვინ უნდა ჩაწეროს ჟურნალისტმა და ვინ არა.

ეს პრობლემები ერთი პერიოდი მოვაგვარეთ, მინდა ვთქვა, რომ არხის დირექტორის ჩარევით მოგვარდა ეს პრობლემები. გეტყვით, რომ 2 წლის განმავლობაში ანალიტიკურ გადაცემაში, ახალ კვირაში პოლიტიკა ოფიციალურად იყო აკრძალული, თუმცა არხის დირექტორთან მოლაპარაკებით, ის ჩაერია, ამას ხაზს ვუსვამ, პოლიტიკა დაბრუნდა. ყველა პრობლემური საკითხი ეთერს დაუბრუნდა. ეს იყო მცირე, მაგრამ კარგი პერიოდი ახალი კვირის გუნდისთვის", — განაცხადა მან TV პირველის ეთერში.

მისივე თქმით, გადაცემას ცენზურასთან და სარედაქციო პოლიტიკასთან ჰქონდა სერიოზული პრობლემა, განსაკუთრებით ბოლო 2 წლის განმავლობაში.

"გადაცემას ჰქონდა წლების განმავლობაში, განსაკუთრებით ბოლო 2 წლის განმავლობაში, ცენზურასთან სერიოზული პრობლემა და გადაცემის სარედაქციო პოლიტიკასთან ჰქონდა სერიოზული პრობლემა. ამას, ალბათ, ახალი კვირის ჟურნალისტები დაგიდასტურებენ. მე 2 წლის განმავლობაში ვცდილობდი ტოპმენეჯმენტიდან დაწყებული ყველა რგოლთან მემუშავა, რომ პრობლემები მოგვეგვარებინა იმიტომ, რომ ეს არის საზოგადოებრივი მაუწყებელი", — აცხადებს იმედა დარსალია.

საზოგადოებრივი მაუწყებლის გადაცემა ახალი კვირის წამყვანმა, იმედა დარსალიამ დღეს 17 თებერვალს განაცხადა, რომ გადაცემა გააჩერეს და ეთერიდან მოხსნეს, რაზეც ტელეკომპანიაში ამბობენ, რომ დაგეგმილია რეორგანიზაცია. როგორც On.ge-ის დარსალია ეუბნება, ინფორმაცია 28 დეკემბერს მიაწოდეს, თუმცა მისთვის უცნობია, რატომ აღარ არის გადაცემის წამყვანი. დარსალიას თქმით, უთხრეს, რომ გადაცემა "ფორმატს" იცვლის.