უკრაინის პრეზიდენტმა, ვოლოდიმირ ზელენსკიმ ამერიკის შეერთებული შტატების პრეზიდენტი, ჯო ბაიდენი უკრაინაში მიიწვია. ამის შესახებ ინფორმაციას უკრაინის პრეზიდენტის ადმინისტრაცია ავრცელებს.

"დარწმუნებული ვარ, რომ უახლოეს დღეებში, რომელიც გადამწყვეტია სიტუაციის სტაბილიზაციისთვის, თქვენი ჩამოსვლა კიევში ძლიერი სიგნალი იქნება და ხელს შეუწყობს დეესკალაციას", — უთხრა ზელენსკიმ ბაიდენს.

პრეზიდენტებს შორის სატელეფონო საუბრისას ლიდერებმა გაცვალეს ინფორმაციები, უკრაინის გარშემო განვითარებული მოვლენების შეფასებები და განიხილეს დეესკალაციის გზები.

პრეზიდენტის ადმინისტრაციის განცხადებით, ზელენსკიმ ხაზგასმით აღნიშნა, რომ უკრაინულ მხარეს ესმის ყველა არსებული რისკი და მზად არის ნებისმიერი განვითარებისთვის.

"ჩვენ შევაჩერებთ ნებისმიერ ესკალაციას უკრაინის მიმართულებით. უკრაინის დედაქალაქი კიევი და ჩვენი სახელმწიფოს სხვა ქალაქები — ხარკოვი და ლვოვი, დნიპრო და ოდესა უსაფრთხო და საიმედო დაცვის ქვეშ არიან", — აღნიშნა მან.

უკრაინის პრეზიდენტის თქმით, გრძნობენ აშშ-ისა და სხვა პარტნიორების მხარდაჭერას და იმედოვნებენ, რომ ეს ხელს შეუწყობს პანიკის გავრცელების აღკვეთას.

11 თებერვალს ამერიკის შეერთებული შტატების სახელმწიფო მდივნმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას. მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა.

სხვა ქვეყეყნებიც, მათ შორის ბრიტანეთი, ასევე მოუწოდებენ საკუთარ მოქალაქეებს დატოვონ უკრაინა. დიდი ბრიტანეთის ელჩმა უკრაინაში, მელინდა სიმონსმა კი Twitter-ზე დაწერა, რომ კიევში რჩება და გუნდთან ერთად მუშაობას აგრძელებს.

გაიგე მეტი: