ჯანდაცვის მინისტრმა, ზურაბ აზარაშვილმა კითხვაზე, იზიარებს თუ არა ვაქცინაციასთან დაკავშირებით პრემიერმინისტრის პოზიციას, განაცხადა, რომ ირაკლი ღარიბაშვილი ანტივაქსერი არ არის და ის ძალიან აქტიურად იყო ვაქცინაციის კამპანიაში ჩართული.

"რასაკვირველია, პრემიერი ანტივაქსერი არ არის და შეუძლებელია, რომ იყოს გამომდინარე იქიდან, რომ მას აქვს ორი ვაქცინაცია გაკეთებული. ის ძალიან აქტიურად იყო, პირიქით, ჩართული ვაქცინაციასთან დაკავშირებულ ყველა კამპანიაში, ასევე, იმ სამოტივაციო სისტემაში, რაც 50 წელზე ზევით ჩვენს თანამოქალაქეებზე გავაკეთეთ 200-ლარიანი დანამატი, ასევე, 100-ლარიანი ბუსტერ დოზის შემთხვევასი, აქედან გამომდინარე, იმაზე საუბარი, რომ ანტივაქსერია თუ არ არის, არასწორია", — განაცხადა აზარაშვილმა.

მისივე თქმით, პრემიერმინისტრმა იგულისხმა ის, რომ საქართველოში არსებული ვაქცინები ომიკრონის გადადების რისკს ნაკლებად აზღვევს.

"აქვე დავამატებ იმას, რაც მან თქვა და მე ამას ვისმენდი, ზუსტად გავიგე, რაც იგულისხმა, იყო ის, რომ ომიკრონის შემთხვევაში, რადგან ეს არის ისეთი შტამი და ჩვენ გვაქვს ისეთი ვაქცინები, რომელიც ამ ახალ შტამთან დაკავშირებით გადადების რისკს ნაკლებად აზღვევს, მან თქვა ის, რომ ინფიცირების შემთხვევაში ძალიან მსუბუქად გადაიტანა, რადგან ორჯერ ვაქცინირებული იყო. ომიკრონთან დაკავშირებით, როგორც იცით, ფაიზერმა შექმნა ახალი ვაქცინა და ჩვენ მარტის თვეში უკვე ეს ახალი ვაქცინა გვექნება, რომელიც კონკრეტულად ომიკრონზე მუშაობს, აქედან გამომდინარე იყო მისი კომენტარი", — ამბობს ჯანდაცვის მინისტრი.

იმ ფონზე, როდესაც ქვეყანაში ანტივაქსერული განწყობები მაღალია, ხოლო ვაქცინაციის მაჩვენებელი დაბალი, პრემიერმინისტრი, ირაკლი ღარიბაშვილი ამტკიცებს, რომ ომიკრონის შემთხვევაში ვაქცინა არ მუშაობს და ვაქცინირებულ პირს კორონავირუსი "ჩვეულებრივ" ემართება.

პრემიერმინისტრს ამ თემაზე საუბრისას არ უხსენებია ის, რასაც ეპიდემიოლოგები, მათ შორის, საკოორდინაციო საბჭოს წევრები, არაერთი თვეა იმეორებენ — რომ ბუსტერ დოზის გაკეთება აუცილებელია.