ქართული ოცნების თავმჯდომარის, ირაკლი კობახიძის განცხადებით, უკრაინაში ომის დაწყების რისკი საკმაოდ მაღალია, თუმცა იმედს იტოვებს, რომ ეს არ მოხდება. მისი თქმით, მმართველი გუნდისთვის ამოსავალი წერტილი უკრაინის სუვენერიტეტი და ტერიტორიული მთლიანობაა.

კობახიძე საუბრობს, რომ მთავარი მიზანი და ამოცანა ომის არდაშვებაა და მისი თქმით, სწორედ აქეთკენ უნდა იყოს მიმართული საერთაშორისო თანამეგობრობრობის ძალისხმევაც.

"ჩვენთვის არის შემაშფოთებელი ის მდგომარეობა, რომელიც არის უკრაინაში, გაიზარდა ინტერვენციის საფრთხე. ჩვენ ვამბობდით, რომ ჩვენი მთავარი ამოცანა, მთლიანად საერთაშორისო თანამეგობრობის ამოცანა უნდა ყოფილიყო უკრაინაში ომის არდაშვება. სამწუხაროდ ტენდენციები არ არის მაინცდამაინც კარგი, ჩვენ მაინც ვიტოვებთ იმედს, რომ ომი არ დაიწყება, თუმცა რისკები არის საკმაოდ მაღალი", — თქვა კობახიძემ.

მან ასევე აღნიშნა, რომ ყველაფერი გაკეთდება, რათა თითოეული მოქალაქის უსაფრთხოება იყოს დაცული.

დღეს, 12 თებერვალს უკრაინაში მყოფი საქართველოს მოქალაქეებისთვის ცხელი ხაზი ამოქმედდა. საგარეო საქმეთა სამინისტრო მოქალაქეებს მოუწოდებს, კავშირზე დარჩნენ საქართველოს საელჩოსთან უკრაინაში.

11 თებერვალს ამერიკის შეერთებული შტატების სახელმწიფო მდივნმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას.

მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა.

სხვა ქვეყეყნებიც, მათ შორის ბრიტანეთი, ასევე მოუწოდებენ საკუთარ მოქალაქეებს დატოვონ უკრაინა. დიდი ბრიტანეთის ელჩმა უკრაინაში, მელინდა სიმონსმა კი Twitter-ზე დაწერა, რომ კიევში რჩება და გუნდთან ერთად მუშაობას აგრძელებს.

გაიგე მეტი: