საქართველოს ევროატლანტიკურ სტრუქტურებში ინტეგრაცია და სლოვაკეთის როლი ამ პროცესში, ქართველ და სლოვაკ ბიზნესმენებს შორის თანამშრომლობა და ორ ქვეყანას შორის ტურისტული ურთიერთობის განვითარება - ეს ის ძირითადი საკითხებია, რომლებზეც საქართველოს პრეზიდენტმა, გიორგი მარგველაშვილმა სლოვაკეთის პრეზიდენტის, ანდრეი კისკას ვიზიტის ფარგლებში გამართულ ღონისძიებაზე ისაუბრა.

გიორგი მარგველაშვილმა განმარტა, რომ სლოვაკეთის პრეზიდენტის საქართველოში ჩამოსვლა მნიშვნელოვანი იმპულსია ორ ქვეყნას შორის თანამშრომლობისათვის გაღრმავებისთვის. მან ასევე გაიხსენა გასულ წელს მისი ვიზიტი სლოვაკეთში:

"მე მინდა მადლობა გითხრათ თქვენი მტკიცე მხარდაჭერისთვის საქართველოს ევროპული და ევროატლანტიკური ინტეგრაციის კონტექსტში. მე მიმაჩნია, რომ თქვენი ევროკავშირის პრეზიდენტობა, რომელიც იწყება სულ ცოტა ხანში - ერთ თვეში იქნება მნიშვნელოვანი შესაძლებლობა საქართველოსთვის, რომ უფრო გააღრმავოს ჩვენი ევროინტეგრაციის ტემპი. ჩვენ გვაქვს უკვე ტრადიციული თანამშრომლობა, როგორც კულტურულ, ისე სამხედრო სფეროში და ბუნებრივია, ჩემი ვიზიტითაც სლოვაკეთში და ახლა თქვენი ვიზიტითაც იქმნება სულ უფრო მეტი ახალი შესაძლებლობა ბიზნეს თანამშრომლობის თვალსაზრისით".

მარგველაშვილმა ასევე ხაზი გაუსვა იმ ფაქტს, რომ სლოვაკეთის პრეზიდენტი საქართველოს ბიზნესმენების დიდ ჯგუფთან ერთად ეწვია:

"ის თანამშრომლობები და ის მემორანდუმები, რომლებიც დაიდება ჩვენს პალატებს შორის, გახსნის ფართო შესაძლებლობას სლოვაკი ბიზნესმენების დაინტერესების საქართველოში და ქართველი ბიზნესმენების აქტიური ჩართვის სლოვაკეთის ბიზნესში. მე მინდა ხაზი გავუსვა, რომ ჩვენს შორის სულ უფრო იზრდება როგორც ტურიზმი, ასევე კულტურული თანამშრომლობის და სხვა თანამშრომლობის ფორმები".

სლოვაკეთის პრეზიდენტი ანდრეი კისკა საქართველოს დღეს, 30 მაისს, პირველად ეწვია.