პოლონეთის პრეზიდენტის, ანდჟეი დუდას განცხადებით, საქართველო უნდა იყოს მიწვეული NATO-ში სახელმწიფოს მეთაურის დონეზე. მისივე თქმით, საქართველოსა და უკრაინას უნდა აჩვენონ, რომ ეს ქვეყნები არ მიუტოვებიათ. ამის შესახებ დუდამ NATO-ს გენერალურ მდივანთან, იენს სტოლტენბერგთან შეხვედრის შემდეგ ისაუბრა.

"NATO-ს მადრიდის სამიტამდე საჭიროა, გაიმართოს NATO-უკრაინისა და NATO-საქართველოს შეხვედრები, ეს შევთავაზე გენერალურ მდივანს. ვესაუბრე საქართველოს პრეზიდენტს, ვიდრე პეკინში ჩავიდოდი, თბილისში გავჩერდი. ვისაუბრე უსაფრთხოების სიტუაციაზე, დავინტერესდი მისი ხედვითა და შეფასებით. მე მჯერა, რომ საქართველო უნდა იყოს მიწვეული NATO-ში სახელმწიფოს მეთაურის დონეზე და უნდა შედგეს NATO-საქართველოსა და NATO-უკრაინის შეხვედრაც ამავე დონეზე, რათა მოვახდინოთ სოლიდარობის დემონსტრირება ამ ქვეყნების მიმართ, ვაჩვენოთ, რომ ეს ქვეყნები არ მიგვიტოვებია. ეს ქვეყნები ყოველთვის ლოიალურები იყვნენ ალიანსის მიმართ და ჩვენც უნდა ვაჩვენოთ, რომ NATO-ს ისინი ახსოვს. ეს მნიშვნელოვანია NATO-ს სანდოობისთვის", — თქვა დუდამ. [საზოგადოებრივი მაუწყებლის თარგმანი].

3 თებერვალს პოლონეთის პრეზიდენტი საქართველოში ტრანზიტული რეისით იმყოფებოდა, პრეზიდენტ სალომე ზურაბიშვილთან ერთად განცხადებაც გააკეთა და გამოხატა მხარდაჭერა საქართველოს მიმართ.

პრეზიდენტებმა ისაუბრეს საქართველოს მიმართ რუსეთის აგრესიაზე. დუდას განცხადებით, საქართველოს აქვს ტრაგიკული გამოცდილება რუსეთთან დაკავშირებით და მნიშვნელოვანია, რომ ზურაბიშვილმა ამაზე მოსაზრება მკაფიოდ აღნიშნა.

მისივე თქმით, მნიშვნელოვანია, ერთობლივი კონსულტაციები და მეტი ძალისხმევის გამოჩენა ამ კუთხით, ვინაიდან ამას დიდი მნიშვნელობა აქვს უკრაინის უსაფრთხოებაზე.