საპროცედურო საკითხთა კომიტეტმა ლეიბორისტული პარტიის ლიდერის, შალვა ნათელაშვილის, დროას ლიდერის, ელენე ხოშტარიასა და ლელოს ლიდერის, ბადრი ჯაფარიძისთვის საპარლამენტო მანდატის შეწყვეტას მხარი დაუჭირა.

ნათელაშვილმა, რომელიც პარლამენტში შესვლის კატეგორიული წინააღმდეგი იყო და ოპოზიციას ამ გადაწყვეტილების გამო აკრიტიკებდა, 6 იანვარს განაცხადა, რომ პარლამენტში შესვლა მისთვის "სიკვდილი და შეურაცხყოფაა", მაგრამ როცა საქმე ქვეყნის ინტერესებზეა "პირადი ემოცია და შეურაცხყოფა ხანდახან მეორეხარისხოვანია". მისი თქმით, პარტიაში მიდიოდა მსჯელობა პარლამენტში შესვლასთან დაკავშირებით, მიუხედავად იმისა, რომ ის თანახმა არ იყო, მზად იყო, რომ ეს ნაბიჯი გადაედგა.

შალვა ნათელაშვილი პარლამენტში შესვლასთან დაკავშირებით, 10 იანვარს ფეისბუქგამოკითხვა ჩაატარა. ფეისბუქზე მან დასვა კითხვა — "მას შემდეგ რაც ყველა ოპოზიციურმა პარტიამ პარლამენტში შესვლით აზრი დაუკარგა ბოიკოტს, ფიქრობთ თუ არა, რომ ლეიბორისტულმა პარტიამ უნდა გამოიყენოს თავისი მანდატი და შესაბამისად, მე შევიდე პარლამენტში?" — და განაცხადა, რომ პარტია საბოლოო გადაწყვეტილებას სწორედ დაფიქსირებული პოზიციის გათვალისწინებით მიიღებს.

12 იანვარს მან თქვა, რომ პარლამენტში შესვლის შემთხვევაში მისი უპირველესი მოთხოვნა 40-წუთიანი სიტყვაა და კიდევ ერთხელ აღნიშნა, რომ ოპოზიციის მიერ პარლამენტში შესვლამ ბოიკოტს აზრი დაუკარგა.

დეპუტატის, შალვა შავგულიძის განცხადებით, საპარლამენტო უმრავლესობას ნათელაშვილის მიმართ განსხვავებული მიდგომა აქვს. მისი თქმით, ოპოზიციის ნაწილის მიერ სხდომათა გაცდენა ბოიკოტის გამო, წარსულში საპატიოდ ჩაითვალა, ამიტომ, იგივე უნდა განმეორდეს ნათელაშვილის შემთხვევაშიც. შავგულიძემ ხაზი გაუსვა იმასაც, რომ ნათელაშვილს საპარლამენტო საქმიანობაში ჩართვის სურვილი საჯაროდ აქვს დაფიქსირებული.

ნაციონალური მოძრაობის დეპუტატი, თამარ კორძაია კი ფიქრობს, რომ სხდომაზე ნათელაშვილი უნდა მოიწვიონ და მას პოზიციის დაფიქსირების საშუალება მისცენ.

რაც შეეხება ელენე ხოშტარიას, ის პარლამენტში ევროპული საქართველოს სიით მოხვდა, 2020 წლის 20 დეკემბერს მან ევროპული საქართველო დატოვა, პარტია დროა შექმნა და პარლამენტში შესვლაზე უარი თქვა. ხოშტარიას ხელი არც ევროსაბჭოს პრეზიდენტის, შარლ მიშელის მედიაციის მიღწეული შეთანხმების დოკუმენტისთვის მოუწერია.

რაც შეეხება ჯაფარიძისთვის მანდატის შეწყვეტის საკითხს, ამის მიზეზად მმართველი გუნდი საქალაქო სასამართლოს მიერ მიღებულ გადაწყვეტილებას ასახელებს. საქართველოს კონსტიტუციის 39-ე მუხლის მიხედვით, პარლამენტის წევრს უფლებამოსილება ვადამდე შეუწყდება თუ სასამართლოს განაჩენით დამნაშავედაა ცნობილია.

12 იანვარს, მოსამართლე გიორგი არევაძემ ბადრი ჯაფარიძეს, მამუკა ხაზარაძესა და ავთანდილ წერეთელს ე.წ. ფულის გათეთრების საქმეზე მუხლი გადაუკვალიფიცირა და დამნაშავედ თაღლითობაში ცნო. ჯაფარიძეს და ხაზარაძეს სასამართლომ 7-7 წელი მიუსაჯა, თუმცა საქმის ხანდაზმულობის გამო სასჯელი გაუუქმდათ.

მანდატების შეწყვეტის საკითხზე საბოლოო გადაწყვეტილებას მომავალ კვირას, პლენარულ სხდომაზე მიიღებენ.