რუს ოფიცერთა გაერთიანებამ ღია წერილი გამოაქვეყნა და მოითხოვა, პრეზიდენტმა, ვლადიმერ პუტინმა უარი თქვას "ომის პროვოცირების დანაშაულებრივ პოლიტიკაზე" და გადადგეს. ოფიცერთა გაერთიანების წევრები არიან, როგორც მოქმედი სამხედროები, ასევე ვეტერანები. წერილი კი ასამბლეის თავმჯდომარემ, ყოფილმა გენერალ-პოლკოვნიკმა, ლეონიდ ივაშოვმა გამოაქვეყნა.

მისი თქმით, უკრაინასთან ომის დაწყების არანაირი საფუძველი არ არსებობს და პუტინი ცდილობს ძალაუფლება დანაშაულებრივი გზებით შეინარჩუნონ. ორგანიზაციის წევრი ოფიცრები განმარტავენ, რამდენად ცუდი შედეგების მომტანი შეიძლება იყოს მსგავსი დაპირისპირება და ამტკიცებენ, თითქოს აქამდე რუსეთი მხოლოდ "იძულებით, სამართლიან" ომებს აწარმოებდა საგარეო საფრთხის ასარიდებლად, ახლა კი საფრთხე ქვეყნის შიგნით აქვთ და ამას უნდა მიხედონ. ასეთ საფრთხეს ისინი დემოგრაფიულ პრობლემებში ხედავენ.

"დღეს კაცობრიობა ცხოვრობს ომის მოლოდინით. ომი დანაკარგი, ნგრევა, ადამიანების ტანჯვა, ცხოვრების ჩვეული სტილის ნგრევა, სახელმწიფოს და ერის სასიცოცხლო საქმიანობების მოშლაა. დიდი ომი დიდი ტრაგედიაა, ეს კი მძიმე დანაშაულია. ისე გამოვიდა, რომ მოსალოდნელი კატასტროფის ცენტრში აღმოჩნდა რუსეთი და ვფიქრობთ, რომ ეს მის ისტორიაში პირველადაა. აქამდე რუსეთი (სსრკ) აწარმოებდა იძულებით (სამართლიან) ომებს და, როგორც წესი, მაშინ, როცა სხვა გამოსავალი არ იყო, როცა ქვეყნის და საზოგადოების სახელმწიფო ინტერესები იყო საფრთხის ქვეშ. და დღეს რა უქმნის რუსეთის არსებობას საფრთხეს, არსებობს ასეთი საფრთხე?" — ვკითხულობთ წერილში.

ოფიცრები პუტინის ხელისუფლებას არაკომპეტენტურს უწოდებენ და აცხადებენ, რომ უკრაინის ირგვლივ მიმდინარე მოვლენები ხელოვნურ და ბოროტ ხასიათს ატარებს.

"რაც შეეხება გარე საფრთხეებს, ისინი, რა თქმა უნდა, არსებობს, მაგრამ, ჩვენი ექსპერტული შეფასებით, ეს საფრთხეები ამჟამად არ არის კრიტიკული და პირდაპირ საფრთხეს არ უქმნიან რუსეთის სახელმწიფოებრიობის არსებობას, მის სასიცოცხლო ინტერესებს. მთლიანობაში, სტრატეგიული სტაბილურობა შენარჩუნებულია, ბირთვული იარაღი ნატოს ძალების საიმედო კონტროლს ექვემდებარება და ისინი არ ავლენენ მუქარას", — წერენ ისინი.

ოფიცრები ამბობენ, რომ რუსეთი შიდა და საგარეო პოლიტიკის შედეგად ხელს კრავს თითქმის ყველა მეზობელს. მათივე თქმით, ომის შემთხვევაში რუსეთს მოუწევს არამხოლოდ უკრაინასთან, არამედ ნატოს წევრ ქვეყნებთან ბრძოლა.

"უკრაინის წინააღმდეგ სამხედრო ძალის გამოყენება, პირველ რიგში — კითხვის ნიშნის ქვეშ დააყენებს რუსეთის, როგორც სახელმწიფოს არსებობას; მეორე — რუსებს და უკრაინელებს სამუდამოდ სასიკვდილო მტრებად აქცევს; მესამე — ორივე მხრიდან ათასობით, ათი ათასობით ახალგაზრდა ჯანმრთელი ადამიანი დაიღუპება, რაც აისახება ქვეყნების დემოგრაფიულ მდგომარეობაზე. ბრძოლის ველზე, თუ ეს მოხდება, რუსული ჯარები შეეჯახებიან არამხოლოდ უკრაინელ სამხედროებს, რომელთა შორის ბევრი რუსი იქნება, ასევე ნატოს ქვეყნების სამხედროებსა და ტექნიკას, ალიანსის წევრი ქვეყნები კი ვალდებული იქნებიან, რუსეთს ომი გამოუცხადონ.

ერდოღანმა გასაგებად განაცხადა, ვის მხარეს იბრძოლებს თურქეთი. შესაძლოა ვივარაუდოთ, რომ თურქეთის ორ საველე არმიას და ფლოტს უბრძანებენ, "გაათავისუფლონ" ყირიმი და სევასტოპოლი, ასევე, შესაძლოა, კავკასიაში შეჭრაც", — წერენ ისინი.

გარდა ზევითგანხილული მოსალოდნელი ვარიანტებისა, ოფიცრები ამბობენ, რომ ომის შემთხვევაში რუსეთს შეიყვანენ იმ ქვეყნების სიაში, რომლებიც საფრთხეს უქმნიან საერთაშორისო უსაფრთხოებას, დააკისრებენ სანქციებს, გარიყავენ საერთაშორისო თანამეგობრობიდან და შესაძლოა, ქვეყანამ დაკარგოს დამოუკიდებელი სახელმწიფოს სტატუსი.

მათივე თქმით, ასეთი შედეგების არდანახვა პრეზიდენტს, მთავრობას და თავდაცვის სამინისტროს არ შეუძლიათ, რადგან "ამდენად სულელებიც არ არიან". ამიტომ სვამენ კითხვას: "რა არის რეალური მიზანი დაძაბულობის პროვოცირების და ფართომასშტაბიანი სამხედრო ქმედებების შესაძლო განვითარების?" ამ კითხვას ისინი თავადვე პასუხობენ და ფიქრობენ, რომ პუტინი ცდილობს დანაშაულებრივი გზით შეინარჩუნოს ხელისუფლება და რუსი ხალხი გაანადგუროს.

"ჩვენი აზრით, ქვეყნის ხელმძღვანელობამ იმის გაცნობიერებით, რომ არ ძალუძს ქვეყნის სისტემური კრიზისიდან გამოყვანა და ამან შეიძლება გამოიწვიოს ხალხის აჯანყება და ხელისუფლების შეცვლა — ოლიგარქების, კორუმპირებული ჩინოვნიკების, მოსყიდული მედიის და ძალოვნების მხარდაჭერით გადაწყვიტა გაეაქტიურებინათ პოლიტიკური ხაზი რუსული სახელმწიფოებრიობის და ქვეყნის ძირძველი მოსახლეობის საბოლოო განადგურებისთვის.

ომი კი საშუალებაა, რომელიც მოაგვარებს ამ პრობლემას, რათა გარკვეული დროით შეინარჩუნონ თავისი ანტიეროვნული ძალაუფლება და ხალხისგან მოპარული სიმდიდრე. სხვა ახსნას ვერ შემოგთავაზებთ", — წერენ ისინი.

სწორედ ამიტომ, ოფიცრები მოითხოვენ, პუტინმა უარი თქვას ამ პოლიტიკაზე, რომლის გამოც რუსეთი აღმოჩნდება მარტო დასავლეთის ძალების წინააღმდეგ და შექმნას პირობები რუსეთის კონსტიტუციის მუხლის განსახორციელებად — გადადგეს.

ოფიცრები მოუწოდებენ მოქალაქეებს, მოქმედ და ყოფილ სამხედროებს, გამოიჩინონ სიფხიზლე, მხარი დაუჭირონ მათ მოთხოვნებს და აქტიურად გამოვიდნენ პროპაგანდის და ომის წინააღმდეგ.

როგორც რუსული მედია წერს, ოფიცრების წერილი მათ ვებგვერდზე 31 იანვარს გამოქვეყნდა, თუმცა ყურადღების ცენტრში ახლა მოექცა. მათივე ინფორმაციით, ლეონიდ ივაშოვი ცნობილია პროსაბჭოა და ნაციონალურ-პატრიოტული ხედვებით.