მინერალური რესურსების ეროვნულის სააგენტოს ცნობით, სოფელ შქმერში წიაღისეულის მომპოვებელ კომპანიას ლიცენზია შეუჩერდა. მათი განცხადებით, შქმერში ლიცენზია სასარგებლო წიაღისეულის მოპოვებაზე აღარ გაიცემა.

სააგენტოში ამბობენ, რომ პრემიერმინისტრის დავალებით შპს ტექნოლოჯი 2021-ისა და შპს მნ ნორთი-ს მიერ ლიცენზიით გათვალისწინებული საქმიანობა შეისწავლეს. მათი თქმით, შემოწმების შედეგად, შპს ტექნოლოჯი 2021-ის მიერ ცალკეული სალიცენზიო პირობების დარღვევები გამოავლინეს — რაც შეეხება შპს მნ ნორთი-ს, კომპანიას სალიცენზიო საქმიანობა არ დაუწყია.

"გამოვლენილ დარღვევებზე, შედგა ადმინისტრაციული სამართალდარღვევის ოქმი, რომელიც ონის მაგისტრატ სასამართლოში გადაიგზავნა. კანონმდებლობით გათვალისწინებულია ლიცენზიანტისთვის გონივრული ვადის მიცემა სალიცენზიო პირობების დასაცავად და ჯარიმის დაკისრება. სასამართლო სხდომა ჯერ არ ჩატარებულა", — აღნიშნულია განცხადებაში.

მათივე განცხადებით, 2021 წლის 22 ნოემბერს საქმის მასალები შესწავლისა და შემდგომი რეაგირების მიზნით გარემოსდაცვითი ზედამხედველობის დეპარტამენტში გაიგზავნა.

ადგილობროივები შქმერში მანგანუმის მოპოვებას რამდენიმე თვეა აპროტესტებენ. მათ აქცია რამდენჯერმე გამართეს და აღნიშნეს, რომ წიაღისეულის მოპოვება დააბინძურებდა გარემოს, საფრთხეს შეუქმნიდა საძოვრებსა და მიწებს.