ვეტერინარების ჩადენილ სასწაულებზე მაინცდამაინც ხშირად არ საუბრობენ. არადა, ამ შთამბეჭდავი პროფესიის ადამიანები თითქმის ყოველდღე ახდენენ სასწაულებს — განა სხვა რამ შეიძლება ეწოდოს იმ პაციენტის მკურნალობასა და გამომჯობინებას, რომელსაც საკუთარ პრობლემაზე ლაპარაკი არ შეუძლია?!

თუმცა, ის შემთხვევა, რომელიც ცოტა ხნის წინ ვეტერინარულ კლინიკა ვეტექსში მოხდა, მაინც უჩვეულო იყო. კლინიკაში, არც მეტი, არც ნაკლები, ბატკანძერი აღმოჩნდა. ამბის შესახებ ინფორმაცია არასამთავრობო ორგანიზაცია ბუნების კონსერვაცია საქართველომ გაავრცელა.

ფრინველი შეუძლო მდგომარეობაში მცხეთის მახლობლად უპოვიათ, რის შემდეგაც, თბილისის ზოოპარკს დაუკავშირდნენ. გარემოსდაცვითი ზედამხედველობის დეპარტამენტმა ბატკანძერი ჯერ ზოოპარკში, მოგვიანებით, კი კლინიკაში გადაიყვანა. როგორც აღმოჩნდა, ფრინველს მოზრდილი ბასრი ნივთი, საკანცელარიო დანა, ჰქონდა გადაყლაპული.

ფოტო: ვეტერინარული კლინიკა ვეტექსი

ბატკანძერის დასახმარებლად რთული ოპერაციის ჩატარება იყო საჭირო. როგორც კლინიკა წერს, მსგავსი ოპერაციების გაკეთება საინჰალაციო ანესთეზიისა და იზოფლურანის წყალობით გახდა შესაძლებელი. გამოკვლევებისა და მკურნალობის ხარჯები ბუნების კონსერვაცია საქართველომ დაფარა.

საბოლოოდ, ოპერაციამ წარმატებულად ჩაიარა და ბატკანძერიც ბასრი საგნისგან გაათავისუფლეს. ფრინველი რეაბილიტაციას თბილისის ზოოპარკში გაივლის და შემდეგ თავის საბინადროში დაბრუნდება.

ბატკანძერის ფრთების სიგრძე 2,4 მეტრს შეადგენდა.

ფოტო: ვეტერინარული კლინიკა ვეტექსი

ბატკანძერის პოპულაცია ბუნებაში იკლებს. სახეობა ბუნების კონსერვაციის საერთაშორისო კავშირის წითელ ნუსხაში 2004 წლიდანაა შეტანილი, 2014 წლიდან კი საფრთხესთან ახლოს მყოფის სტატუსი აქვს.