ცოტა ხნის წინ ამერიკელმა მსახიობმა, პიტერ დინკლიჯმა, დისნეი ფიფქიას ახალი ვერსიის გადაღების გამო გააკრიტიკა და ამ ნაბიჯს "უკუსვლა" უწოდა. დინკლიჯის თქმით, ფილმის შემქმნელები ორიგინალური ნაწარმოების მთავარ პრობლემაზე თვალს ხუჭავენ — უფრო კონკრეტულად, იმაზე, თუ როგორ წარმოაჩენს ანიმაცია შეზღუდული შესაძლებლობის მქონე პირებს.

"ისევ ფიფქია და შვიდ ჯუჯას ჰყვები. სხვა მხრიდან შეხედე, რას აკეთებ. ჩემთვის არანაირი აზრი არ აქვს; ერთი მხრივ, პროგრესული ხარ, მაგრამ მაინც უკუსვლით მიდიხარ და გამოქვაბულში ერთად მცხოვრებ შვიდ ჯუჯაზე იღებ ფილმს", — აღნიშნა მსახიობმა, რომელსაც ნანიზმის გავრცელებული ფორმა, აქონდროპლაზია, აქვს.

თუმცა, დინკლიჯის კრიტიკას მალევე გამოეხმაურა დისნეი და გაჩენილ კითხვებს პასუხი გასცა.

"ორიგინალურ ანიმაციაში გამოყენებული სტერეოტიპები რომ უფრო არ განვამტკიცოთ, ამ შვიდი პერსონაჟის საკითხს სხვაგვარად მივუდგებით", — აცხადებს დისნეის წარმომადგენელი, — "გავდივართ კონსულტაციებს იმ ადამიანებთან, ვისაც ნანიზმი აქვს. უფრო მეტ ინფორმაციას ამის შესახებ მას შემდეგ გაგიზიარებთ, რაც ფილმზე აქტიური მუშაობა დაიწყება".

ფიფქია და შვიდი ჯუჯა დისნეის პირველი სრულმეტრაჟიანი ანიმაცია იყო, რომელიც 1937 წელს გამოვიდა. ის ერთ-ერთია დისნეის კლასიკად ქცეული იმ ანიმაციებიდან, რომელთა ახალი ვერსიების გადაღებაც კინოსტუდიამ გადაწყვიტა.

უკვე ვიცით, რომ ფიფქიას ახალ ვერსიაში მთავარი პერსონაჟის როლს რეიჩელ ზეგლერი მოირგებს, ბოროტი ჯადოქრის პერსონაჟს კი გალ გადოტი განასახიერებს. ფილმის რეჟისორი მარკ უები იქნება.