ავტომატურმა მტვერსასრუტმა კემბრიჯის ერთ-ერთ სასტუმროს კართან შეჩერება ვერ მოახერხა და მოძრაობა გააგრძელა.

თანამშრომლებმა განაცხადეს, რომ რობოტმა მტვერსასრუტმა სასტუმროს დატოვების შემდეგ მოძრაობა განაგრძო და "ნებისმიერ ადგილას შეიძლება წასულიყო". ამ ამბავს სოციალურ მედიაშიც დიდი გამოხმაურება მოჰყვა და მომხმარებლები იმედოვნებდნენ, რომ რობოტი მტვერსასრუტი მოგზაურობით ტკბებოდა, რადგან მას ველურ გარემოში საფრთხე არ ემუქრება.

სასტუმროს თანამშრომლებმა რობოტის "გაქცევის" შესახებ სოციალურ მედიაში დაპოსტეს და აღმოჩენის შემთხვევაში, მისი დაბრუნება ითხოვეს. "წესით, რობოტი მტვერსასრუტები სასტუმროს კარს აღიქვამენ, ჩერდებიან და უკან ბრუნდებიან. თუმცა ერთ-ერთმა რობოტმა გაქცევა ამჯობინა", — ვკითხულობთ თანამშრომლების პოსტში.

ფოტო: Twitter

რობოტის გაუჩინარება პირველი 15 წუთი ვერავინ შენიშნა, ხოლო ძებნის შემდეგ კი დარწმუნდნენ, რომ მტვერსასრუტმა გაქცევა ოსტატურად "მოახერხა". მენეჯერის ასისტენტის განცხადებით, რობოტი მხოლოდ სასტუმროს დამტენ სადგურთან არის თავსებადი და სხვებისთვის "უსარგებლოა".

რამდენიმე დღის შემდეგ სასტუმროს დამლაგებელმა ბუჩქებში "დამალული" მტვერსასრუტი იპოვა და სხვა რობოტებთან დააბრუნა.