იტალიის სენატის ვირტუალური ღონისძიება Zoom-ის შეხვედრაზე შეპარულმა პირმა ჩაშალა, რომელმაც ეკრანზე Final Fantasy-ის პერსონაჟების მონაწილეობით პორნო გააზიარა. ვირტუალურ ღონისძიებას პოლიტიკოსები, აკადემიკოსები და ერთ-ერთი ნობელის ლაურეატიც ესწრებოდა.

ვიდეოში ნაჩვენები იყო Final Fantasy VII-ის პერსონაჟის, ტიფა ლოკჰარტის, პორნო, რომელიც შეხვედრაზე რამდენიმე წამით ჩაირთო, თუმცა დამსწრეებმა ეს გვიან გააცნობიერებს და შემდეგ შეეცადნენ, რომ მისი გამზიარებელი ადამიანი ზუმის შეხვედრიდან გაეგდოთ.

"სამედიცინო და სამეცნიერო კვლევების შედეგები, მათ სწრაფ ხელმისაწვდომობასთან და სანდოობასთან ერთად...", — ამბობდა ერთ-ერთი მომხსენებელი, როცა მისი ხმის პარალელურად იაპონური სიტყვები და კვნესა გაიგონა.

"აქ არის ადამიანი, რომელიც შეხვედრაზე შემოიპარა და ვითხოვ, მის გაგდებაში დამეხმაროთ", — ასე შეეცადა სიტუაციის განმუხტვას ერთ-ერთი ორგანიზატორი.

სენატორმა მარია ლაურა მანტოვანმა იტალიურ პრესასთან განაცხადა, რომ მომხდარის შესახებ პოლიციას უკვე აცნობა. მას შემდეგ, რაც ბოლო ორი წლის განმავლობაში პანდემიის გამო მრავალი ღონისძიება ვირტუალურ სივრცეში იმართება, ე.წ. Zoom bombing აქტუალური გახდა, რაც იმას გულისხმობს, რომ დაუპატიჟებელი ადამიანი ვირტუალურ ღონისძიებაზე შეღწევას ახერხებს და მის ჩაშლას პორნოს გაზიარებითა და სხვა ხერხებით ცდილობს. ღონისძიებებისა და შეხვედრების ჩაშლის მცდელობები უფრო და უფრო ხშირი ხდება.