საერთაშორისო გამჭვირვალობა-საქართველოს ახალი კვლევის თანახმად, სახელმწიფო შესყიდვების შედეგად 15-მა ადგილობრივმა ტელევიზიამ ჯამში 686 ათას ლარზე მეტი მიიღო. ამაზე საუბარია კვლევაში, სადაც TI-მ მუნიციპალიტეტების მიერ 2020 წელს განხორციელებული ის სახელმწიფო შესყიდვები შეისწავლა, რომლის მიზანსაც სამაუწყებლო მომსახურების მიღება წარმოადგენდა.

კვლევის მიხედვით, 63 მუნიციპალიტეტიდან სამაუწყებლო მომსახურების შესყიდვა 18-მა განახორციელა, კერძოდ, 14 ტენდერი და 4 გამარტივებული შესყიდვა ჩატარდა. ამასთან, TI-ის განცხადებით, შესყიდვის საგანი ძირითადად სოციალური რეკლამა, სარეკლამო რგოლების დამზადება-გაშვება და საზოგადოებისთვის მნიშვნელოვანი ინფორმაციის გავრცელება იყო.

აქვე აღნიშნულია, რომ ზოგიერთი ხელშეკრულება საინფორმაციო გამოშვებაში მუნიციპალიტეტის საქმიანობის შესახებ ინფორმაციის გაშვებას, მუნიციპალიტეტის პრესცენტრის მიერ მომზადებული მასალების ეთერში განთავსებას და გადაცემების მომზადებას გულისხმობდა.

ფოტო: საერთაშორისო გამჭვირვალობა — საქართველო

ორგანიზაციაში აღნიშნავენ, რომ ყველაზე მსხვილი შესყიდვები რუსთავის, მარნეულის, გურჯაანის, ქუთაისის და ნინოწმინდის მუნიციპალიტეტებმა განახორციელეს, ხოლო ტელევიზიებიდან ყველაზე მეტი თანხა, 160 ათასი ლარი სახელმწიფო შესყიდვებით ქვემო ქართლის ტელე-რადიო კომპანიამ მიიღო.

როგორც კვლევაში ვკითხულობთ, ცალკეული მაუწყებლებისათვის სახელმწიფო შესყიდვებიდან მიღებულ თანხებს მნიშვნელოვანი წილი უკავია საერთო შემოსავალში — უმეტეს შემთხვევაში 20%-ზე მეტია, ზოგჯერ კი 50%-საც აჭარბებს.

*ფარვანას 2020 წლის ჯამური შემოსავალი GNCC-ის ვებგვერდზე სრულად ასახული არ არის

ფოტო: საერთაშორისო გამჭვირვალობა — საქართველო

TI-ის განცხადებით, 2020 წლის მონაცემებით, ქვეყანაში 89 ტელევიზია მაუწყებლობს, თუმცა მათი თქმით, ჯამური შემოსავლების მიხედვით, ათეულში არც ერთი რეგიონული ტელევიზია არ არის.

*ჯამურ შემოსავალში არ არის დათვლილი არასამაუწყებლო შემოსავალი და სახელმწიფო დაფინანსება **ტელეიმედის შემოსავალი მოიცავს ტელეკომპანია იმედს, GDS-ს და ტელეკომპანია მაესტროს

ფოტო: საერთაშორისო გამჭვირვალობა — საქართველო

კვლევაში აღნიშნულია, რომ 10 ყველაზე შემოსავლიან ტელეკომპანიას ბაზრის 91% უკავია, ხოლო დანარჩენი ტელევიზიისთვის დარჩენილი თანხა მხოლოდ 10 მილიონ ლარს შეადგენს.