ენმ-ის პოლიტსაბჭოს თავმჯდომარედ კობა ნაყოფია იქნება. გადაწყვეტილება პოლიტსაბჭოს სხდომის შემდეგ პარტიის თავმჯდომარემ, ნიკა მელიამ გამოაცხადა. მისი თქმით, რაც არ უნდა ორგანიზებული პოლიტიკური ძალა არსებობდეს, გარკვეული დროის შემდეგ, განახლება და გადანაცვლება მნიშვნელოვანია.

"რა თქმა უნდა, ცვლილებების აუცილებლობა განპირობებული არის იმ გამოწვევების გათვალისწინებით, რომლის წინაშე დგას პარტია ენმ და ყველაზე მთავარი, რომლის წინაშეც ვდგავართ თითოეული ჩვენგანი, ქვეყანა და სახელმწიფო", — განაცხადა მელიამ.

ამასთან, როგორც მელიამ აღნიშნა, პეტრე ცისკარიშვილი პარტიის გენერალური მდივანი იქნება, ხოლო თავად თბილისის რაიონული ორგანიზაციის თავმჯდომარეობას შეითავსებს. მისი თქმით, რეფორმების გატარებას პარტიის შიგნით შარშან აპირებდა, მაგრამ შესაძლებლობა არ მიეცა და პროცესი გაიწელა. მისივე განცხადებით, ახლა "გარდაუვალ აუცილებლობად" მიიჩნევს, რომ პარტიამ მნიშვნელოვნად შეცვალოს დღის წესრიგი და შიგთავსი.

"ერთ-ერთი მნიშვნელოვანი საკითხი, რომელიც ასევე უნდა გადაწყდეს ამ ცვლილებების შედეგად არის რა? ერთხელ და სამუდამოდ პოლიტიკური მართლმსაჯულება დასრულდეს და არავის არ ჰქონდეს, ვიქნებით ოპოზიციაში, ვიქნებით ხელისუფლებაში, იმის განცდა, რომ ვიღაცა დაისაჯა ან დაკავებულ იქნა არასამართლიანად. დღეს არცერთი სახელმწიფო ინსტიტუტის მიმართ არ არსებობს არანაირი ტიპის ნდობა საზოგადოებაში და ეს არის მთავარი პრობლემა", — განაცხადა მან.

გაურკვევლობა გამოიწვია პარტიის პოლიტსაბჭოს თავმჯდომარის პოსტმა. მელიამ ბრიფინგზე განაცხადა:

"მე ამ წუთის მდგომარეობით ვიყავი პარტიის თავმჯდომარე და ამავე დროს ვიყავი პოლიტიკური საბჭოს თავმჯდომარე და სამწუხაროდ, პარტიის გაძლიერებას არ ემსახურებოდა სტრუქტურულად გაუმართავი მდგომარეობა, რომელშიც ჩვენ ვიყავით დღეის მდგომარეობით".

თუმცა მოგვიანებით თავადვე თქვა, რომ პარტიას პოლიტსაბჭოს თავმჯდომარე არ ჰყავდა და ცვლილებები დიდი ხნის წინ იყო დაგეგმილი.

"პოლიტიკური საბჭოს თავმჯდომარე პარტიას არ ჰყავდა დღემდე, გესმით. მე როგორ ვიყავი, მე ვიყავი პარტიის თავმჯდომარე, რომელიც პოლიტიკური საბჭოს არარსებობას მტკივნეულად განიცდიდა და სულ ტურბულენტურ პროცესში ვიყავით, დიდი ხანია გვქონდა ეს გადაწყვეტილება ჩვენ მიღებული, მაგრამ განვითარებული პროცესების კვალდაკვალ დღემდე ვერ მოხერხდა", — განაცხადა მელიამ.

გაიგეთ მეტი: