შინაგან საქმეთა სამინისტროს მიერ გავრცელებული სამხარაულის ექსპერტიზის ბიუროს დასკვნის მიხედვით, TV პირველის ოპერატორის, ლექსო ლაშქარავას გარდაცვალების მიზეზი ჰეროინით ინტოქსიკაცია გახდა. უფრო ზუსტად, ამის შედეგად გამოწვეული გულ-სისხლძარღვთა და სუნთქვის მწვავე უკმარისობა.

ექსპერტიზის დასკვნის ნაწილი ლაშქარავას გარდაცვალებიდან 6 თვის შემდეგ გასაჯაროვდა. ის თავდაპირველად რადიო თავისუფლებამ გამოაქვეყნა. On.ge დაუკავშირდა შინაგან საქმეთა სამინისტროს, საიდანაც დოკუმენტის 6 გვერდი მოგვაწოდეს, თუმცა აქვეა აღნიშნული, რომ დასკვნა ჯამში 37 ფურცლისგან შედგება. შსს-ს ინფორმაციით, დოკუმენტი სამხარაულის ექსპერტიზის ბიუროსგან 30 დეკემბერს მიიღეს.

შსს-ს მიერ გავრცელებული ექსპერტიზის დასკვნის მიხედვით, ლაშქარავას ორგანიზმში ჰეროინის გარდა აღმოაჩინეს მორფინის, მონოაცეტილმორფინისა და კოდეინის გარკვეული დოზებიც.

დოკუმენტში ჩამოთვლილია ის ფიზიკური დაზიანებებიც, რომელიც ლაშქარავამ 5 ივლისს, ძალადობრივი ჯგუფების თავდასხმის შედეგად მიიღო: სისხლნაჟღენთები მარცხენა თვალბუდის მიდამოში, მარცხენა თვალბუდის მედიალური კედლისა და ზედაყბის ძვლის მრავალფრაგმენტული მოტეხილობა, ჰემოსინუსიტი, სისხლნაჟღენთები და ნაჭდევები სხეულზე. ასევე, სამედიცინო დოკუმენტების ჩანაწერების მიხედვით, მას ჰქონდა თავის ტვინის შერყევა, რქოვანი ტრავმული ეროზიო და თვალის კაკლის კომიციო. თუმცა, დასკვნაში წერია, რომ ლაშქარავას გარდაცვალების მიზეზი ეს დაზიანებები არ გამხდარა.

"დაზიანებები განვითარებულია რაიმე მკვრივ-ბლაგვი საგნის მოქმედებით. ცოცხალ პირთა სასამართლო სამედიცინო ექსპერტიზისას, სხეულის დაზიანების ხარისხის განსაზღვრის დროს დაზიანებები ერთობლიობაში აღებული ატარებენ ნაკლებად მძიმე ხარისხის დაზიანების ნიშნებს და არ იმყოფებიან მიზეზობრივ კავშირში დამდგარ შედეგთან", — წერია დოკუმენტში.

დასკვნას ხელს აწერენ შემდეგი ექსპერტები: კონსტანტინე ცქიტიშვილი, ალექსანდრე გეჯაძე, ეკა შონია, მედეა ჭიჭიკოშვილი, მალხაზ ჯოხაძე, მაია გოგიტაური, ნანა კიკალიშვილი და გიორგი ბურკაძე.

აღსანიშნავია, რომ სწორედ დღეს გახდა ცნობილი, რომ გაეროს განათლების, მეცნიერებისა და კულტურის ორგანიზაციამ, UNESCO-მ მოკლულ ჟურნალისტთა სია განაახლა და მასში ლექსო ლაშქარავას სახელიც შეიტანა. მასალაში მითითებულია, რომ ლაშქარავა საქართველოში 2021 წლის 5 ივლისს მოკლეს. როგორც UNESCO წერს, ის 5 ივლისს, თბილისში, ლგბტ აქტივისტებზე თავდასხმის დროს, ღირსების მარშის გაუქმების შემდეგ, მძიმედ დაშავდა და 11 ივლისს საკუთარ სახლში გარდაიცვალა.