საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკი) განცხადებით, ელექტროენერგიის, ბუნებრივი გაზისა და წყალმომარაგების ტარიფები არ გაზრდილა და ფასის მატება არც მომავალში განიხილება. ასე პასუხობენ ისინი მომხმარებლების პროტესტს, რომლებიც ამბობენ, რომ გადასახადი გაცილებით მეტი დაერიცხათ.

კომისიაში ფიქრობენ, რომ სხვადასხვა პოლიტიკური პარტია და პოლიტიკური პირი საზოგადოების შეცდომაში შეყვანის მიზნით არასწორ ინფორმაციას ავრცელებს.

"2022 წლის პირველი იანვრიდან ტარიფები არ შეცვლილა და ძალაშია კომისიის მიერ წინა პერიოდში მოქმედი სამომხმარებლო ტარიფები. ტარიფების ზრდა არ განიხილება. პოლიტიკური პარტიები და სხვადასხვა პოლიტიკური პირები კიდევ ერთხელ ცდილობენ, რომ საზოგადოება შეიყვანონ შეცდომაში და საკუთარი პოლიტიკური ინტერესების გამო, მოსახლეობას აწვდიან ცრუ ინფორმაციას. სემეკი მოუწოდებს მოქალაქეებს, ოპოზიციური პოლიტიკური პარტიებისა და პირების მიერ გავრცელებული ნებისმიერი ინფორმაცია გადაამოწმონ კომისიაში", — აცხადებენ ისინი.

ბოლო დღეებში მოქალაქები სოციალურ ქსელში წერენ, რომ მათ არა მხოლოდ დენის გადასახადის ორი ქვითარი მიუვიდათ, არამედ გადასახადიც გაეზარდათ. საპასუხოდ, 4 იანვარს კომპანიაში განმარტეს, რომ საახალწლო დღეებთან დაკავშირებით, 31 დეკემბერს, 1 და 2 იანვარს გამზადებული ქვითრები არ გაგზავნილა, შესაბამისად, აღნიშნული ქვითრები მომხარებლებს 3 და 4 იანვარს გაუგზავნეს და ისინი დეკემბრის დარჩენილი დღეების ელექტროენერგიის ხარჯს ასახავდა. მომდევნო დღეს კომპანიაში განაცხადეს, რომ ჩვენებების დეტალური ანალიზი მიმდინარეობს და შეცდომების გამოვლენის შემთხვევაში გადასახადები გადაანგარიშდება.