მარტოხელა კაცი ცოლს უზარმაზარი ბილბორდების მეშვეობით ეძებს, რომელზეც მისი ვებგვერდის მისამართიც მითითებულია. ბილბორდის ავტორი 29 წლის მუჰამედ მალიკია, რომელმაც გადაწყვიტა, რომ მომავალი ცოლი ამ გზით გაეცნო და რეკლამები ლონდონისა და ბირმინგემის ქუჩებში განათავსა.

"გადამარჩინე გარიგებით ქორწინებისგან", — ვკითხულობთ ბილბორდზე, თუმცა მისი ავტორი აღნიშნავს, რომ ასეთი ტიპის ქორწინების წინააღმდეგი არ არის, მაგრამ ამ ეტაპზე სურს, რომ მომავალი პარტნიორი თავად იპოვოს.

ფოტო: BBC

მალიკის თქმით, მას უკვე ასობით შეტყობინება მისწერეს, თუმცა ბოლომდე გადახედვა ვერ მოახერხა და წინასწარ არც იმაზე უფიქრია, თუ როგორ შეძლებდა ყველა დაინტერესებული ქალის გაცნობას.

მალიკმა ისიც აღნიშნა, რომ ბილბორდების განთავსებამდე ქალთან შესახვედრად სხვადასხვა ხერხს მიმართა და გაცნობის აპლიკაციებითაც სარგებლობდა, თუმცა, მისი აზრით, ეს საკმაოდ უხერხული იყო. "წარმოშობით პაკისტანელი ვარ და პირველ რიგში, ამ საქმეს დეიდები ჩაუდგნენ სათავეში, მაგრამ ამ მეთოდმა არ გაამართლა" - ამბობს მუჰამედ მალიკი.

ბილბორდები ქუჩებში 14 იანვრამდე დარჩება და როგორც მალიკი ამბობს, მშობლებმა მის გადაწყვეტილებას მხარი დაუჭირეს. მალიკის თქმით, მისი იდეალური პარტნიორი მუსლიმი უნდა იყოს და მომავალი ქმრის ოჯახსაც კარგად უნდა შეეწყოს.