ქართული ოცნების თავმჯდომარის, ირაკლი კობახიძის განცხადებით, როცა პატიმარს სურს, დარჩეს იქ, სადაც მას არ ეკუთვნის, ეს არ უნდა დაუშვას სახელმწიფომ. ასე გამოეხმაურა კობახიძე მიხეილ სააკაშვილის გორის ჰოსპიტლიდან გაწერას და ამ პროცესის დროებით შეჩერებას.

"მიხეილ სააკაშვილს უნდა, რომ იყოს დისკრიმინაციული მოპყრობის მსხვერპლი. მას უნდა, იყოს უკეთეს მდგომარეობაში, ვიდრე სხვა პატიმრები. ეს არის ჩვეულებრივი დისკრიმინაცია და უთანასწორო მოპყრობა. ეს ასე არ უნდა იყოს, ნებისმიერ პატიმარს უნდა ჰქონდეს ერთი და იგივე მოპყრობა სახელმწიფოს მხრიდან და არავინ არ უნდა იყოს განსაკუთრებულად პრივილეგირებული.

როდესაც არსებობს კონკრეტული დასკვნა იმასთან დაკავშირებით, რომ შიმშილობის შემდგომი მკურნალობა დასრულდა ორი კვირის წინ და პატიმარს კვლავაც სურს, დარჩეს იქ, სადაც მას არ ეკუთვნის ყოფნა. ეს არის, რა თქმა უნდა, დისკრიმინაციული მიდგომა და ეს არ უნდა დაუშვას სახელმწიფომ. სახელმწიფოს მიდგომა იქნება ისეთი, რომელიც დაეფუძნება თანასწორობის პრინციპს", — თქვა კობახიძე.

27 დეკემბერს, მთელი საღამოს განმავლობაში ვრცელდებოდა ინფორმაცია გორის სამხედრო ჰოსპიტლიდან მიხეილ სააკაშვილის შესაძლო გადაყვანის შესახებ. თუმცა ამის შესახებ ინფორმირებულები არ იყვნენ სააკაშვილის ადვოკატები და ოჯახის წევრები.

მოგვიანებით სახალხო დამცველის წარმომადგენელი ანა ჯანიაშვილი გორის ჰოსპიტალში მივიდა. მისი განცხადებით, სააკაშვილმა უთხრა, რომ რუსთავის ციხეში მის გადაყვანას, რა დროსაც გონება დაკარგა. ჯანიაშვილის თქმით, ამ შემთხვევას სახალხო დამცველი შეისწავლის.

სააკაშვილის გადაყვანაზე ინფორმაცია უწყებამ მხოლოდ დღეს დაადასტურა. როგორც 28 დეკემბერს პენიტენციურმა სამსახურმა თქვა, რომ გორის სამხედრო ჰოსპიტალმა სააკაშვილი გაწერა, თუმცა გადაყვანა დროებით გადაიდო.