ქართული ოცნების თავმჯდომარის, ირაკლი კობახიძის განცხადებით, შალვა პაპუაშვილი, მისი გამოცდილებით, პიროვნული თვისებებით დაამშვენებდა ნებისმიერი ქვეყნის პარლამენტს.

"მე ვიტყოდი ძალიან მარტივად, რომ თავისი განათლებით, გამოცდილებით, პროფესიონალიზმით, პიროვნული თვისებებით შალვა პაპუაშვილი დაამშვენებდა პარლამენტის თავმჯდომარის პოსტზე ნებისმიერი ქვეყნის პარლამენტს. ამაში, ალბათ ყველა დამეთანხმება", — განაცხადა კობახიძემ.

დღეს, 29 დეკემბერს 88 ხმით 1-ის წინააღმდეგ შალვა პაპუაშვილი პარლამენტის თავმჯდომარედ დაამტკიცეს.

პარლამენტის თავმჯდომარეობის კანდიდატად ქართულმა ოცნებამ შალვა პაპუაშვილი მას შემდეგ წარადგინა, რაც პარლამენტის მაშინ მოქმედმა თავმჯდომარემ კახა კუჭავამ თანამდებობა დატოვა.

პაპუაშვილის ბიოგრაფია და კარიერა

პარლამენტის ვებგვერდზე განთავსებული ინფორმაციის მიხედვით, შალვა პაპუაშვილმა 1998 წელს დაასრულა ივანე ჯავახიშვილის სახელობის თბილისის სახელმწიფო უნივერსიტეტი საერთაშორისო სამართლის სპეციალობით, ხოლო 1999 წელს მიენიჭა ევროპული კერძო სამართლის ხარისხი საარლენდის უნივერსიტეტის მიერ.

2020 წლიდან პაპუაშვილი არის ფრაქცია ქართული ოცნების წევრი. ასევე 2020 წლიდან არის საქართველოს მე-10 მოწვევის პარლამენტის წევრი. 2021 წელს აირჩიეს განათლებისა და მეცნიერების კომიტეტის თავმჯდომარედ. 2020 წლიდან არის ევროპასთან ინტეგრაციის კომიტეტის წევრი.