პრეზიდენტის ყოველწლიური სიტყვით გამოსვლა დღეს, 7 მარტს, 12 საათზე შედგა, რის შემდეგაც, როგორც საპარალამენტო უმრავლესობის ასევე ოპოზიციური პარტიების მონაწილეობით, დებატები დაიწყო. პრეზიდენტმა მედიასთან, კრიმინალთან, სასამართლოსთან, ადამიანის უფლებებთან და სხვა საკითხებთან დაკავშირებით ისაუბრა. გამოსვლას პარლამენტის დეპუტატები, მთავრობის წევრები და დიპლომატიური კორპუსი ესწრებოდა.

ქართული ოცნების წევრებმა პრეზიდენტის მოხსენება კრიტიკულად შეაფასეს. მათი მესიჯბოქსი, ძირითადად, ერთი შინაარსის იყო და შეიცავდა სიტყვებს "არაობიექტური, უშინაარსო, ზედაპირული და რეალობიდან აცდენილი."

დებატების ბოლოს გიორგი მარგველაშვილს კიდევ ერთხელ მიეცა სიტყვის უფლება და განაცხადა, რომ მიუხედავად მის მიმართ კრიტიკისა, ის კმაყოფილია დებატებით.

როგორც პრეზიდენტის ადმინისტრაციის უფროსმა, გიორგი აბაშიშვილმა ჟურნალისტებთან განაცხადა, რომ პრეზიდენტმა დღეს იმედი გაუცრუა როგორ მმართველი გუნდის წარმომადგენლებს, ასევე ოპოზიციას, ვინაიდან მან ისაუბრა ხალხის რეალურ საჭიროებებზე და არა – ცალკეული პოლიტიკური პარტიის დღის წესრიგზე:

"პრეზიდენტი დადის რეგიონებში, ხვდება მოსახლეობას შესაბამისად მისი დღევანდელი მოხსენება გამომდინარეობდა საქართველოს მოქალაქეების რეალური საჭიროებებიდან გამომდინარე. არაფერი განსაკუთრებული აქ ამ შემთხვევაში არ ხდება. ვფიქრობ, რომ ვინც არაადეკვატურს უწოდებს ან რეალობიდან მოწყვეტილს, ეს არის საკმაოდ სამწუხარო, ვინაიდან ეს "არაადეკვატურობა" რეალურად გამოხატავს ხალხის აზრს," - განაცხადა აბაშიშვილმა.