ქართული ოცნების თავმჯდომარე, ირაკლი კობახიძე კითხვაზე, თუ როდის დასრულდება ექსპრეზიდენტ მიხეილ სააკაშვილის საკითხი, ამბობს, რომ ეს 6 წელიწადში, ან, შესაძლოა, უფრო გვიანაც დასრულდეს. მისი თქმით, თუ ქვეყანაში "სამართლიანობა არ იზეიმებს", მშვიდობაც არ იქნება.

კობახიძე ამბობს, რომ ქვეყანაში მშვიდობის ერთხელ და სამუდამოდ დამკვიდრების საშუალებას სააკაშვილი არ იძლეოდა და იმისათვის, რომ ასე მოხდეს, ექსპრეზიდენტის მიმართ სამართალი უნდა აღსრულდეს.

"6 წელიწადში დასრულდება, თუ მანამდე ახალი განაჩენი არ დადგა. შეიძლება უფრო გვიანაც. მარტივად არის აქ საქმე, არის შეფარდებული სასჯელი და ეს სასჯელი საჭიროებს, ბუნებრივია, მოხდას. ეს არის აუცილებელი სამართლიანობისთვის. ჩვენ ახლა ვსაუბრობდით რაღაც პოლიტიკურ მოცემულობაზე, რომელიც უნდა შეიცვალოს. არსებობს მარტივი გამონათქვამი: არ არსებობს მშვიდობა სამართლიანობის გარეშე. თუ სამართლიანობა არ იზეიმებს და თუ სამართლის უზენაესობა არ იქნება უზრუნველყოფილი, ასეთ შემთხვევაში, ბუნებრივია, არ იქნება მშვიდობა", — განაცხადა მან იმედის ეთერში.

მიხეილ სააკაშვილი 1-ელ ოქტომბერს დააკავეს. მას ბრალი წაყენებული აქვს გირგვლიანის, 7 ნოემბრის, ე.წ. პიჯაკებისა და ვალერი გელაშვილის საქმეებზე. ამასთან, გირგვლიანისა და ვალერი გელაშვილის საქმეებზე მას თავისუფლების აღკვეთა დაუსწრებლად მიუსაჯეს, ჯამში 6 წლის ვადით. სწორედ ამაზე იხდის ახლა ის სასჯელს. სასამართლო განხილვები გრძელდება 7 ნოემბრისა და ე.წ. პიჯაკების საქმეზე და გამამტყუნებელი განაჩენის შემთხვევაში, სასჯელის ვადა გაიზრდება.