პარლამენტის თავმჯდომარის თანამდებობიდან გადადგომის შემდეგ, კახა კუჭავამ განაცხადა, რომ ის "შორს არსად მიდის" და პოლიტსაბჭოში, თავის გუნდში გააგრძელებს მუშაობას.

"მე მივიღე გადაწყვეტილება, რომ დავტოვო სპიკერის თანამდებობა. რა თქმა უნდა, ეს არ არის 2-3 დღის გადაწყვეტილება. დაახლოებით თვე არის უკვე ჩვენს გუნდთან ერთად ამ საკითხზე მქონდა საუბარი. მე შორს არსად არ მივდივარ, მე ვრჩები პოლიტსაბჭოში ჩემს გუნდთან ერთად", — განაცხადა მან.

კუჭავას თქმით, ის ძალიან მნიშვნელოვან პროექტს უხელმძღვანელებს, რაზეც საზოგადოება უფრო მეტ დეტალს მომავალ წელს გაიგებს. კუჭავას ამბობს, რომ ეს მის მიერ თანამდებობის დატოვების ყველა მიზეზს "ახსნის".

პარლამენტის თავმჯდომარის პოსტზე ქართულმა ოცნებამ შალვა პაპუაშვილი წარადგინა. ამის შესახებ პარტიის თავმჯდომარემ, ირაკლი კობახიძემ სპეციალურ ბრიფინგზე ისაუბრა.