გირჩი — მეტი თავისუფლების ინფორმაციით, ბათუმში, სახელმწიფო უსაფრთხოების სამსახურის შენობასთან მუსიკის ჩართვისა და პლაკატის გაშლის გამო დაკავებული აქტივისტი სააპელაციო სასამართლომ გაამართლა. რომა მახარაძეს წვრილმან ხულიგნობასა და პოლიციელისადმი დაუმორჩილებლობას ედავებოდნენ. მას ბათუმის საქალაქო სასამართლომ 500 ლარიანი ჯარიმა გამოუწერა.

"ამ წუთებში, ბათუმის საქალაქო სასამართლო განიხილავს, რამდენად სამართლიანად დამაჯარიმეს ცეკვისთვის. ისეთი გრძნობა მაქვს, თითქოს ორიანი მივიღე დირექტორმა მშობლები დაიბარა (იქ არ ვარ). ველოდები მშობლების დაბრუნებას", — წერდა მახარაძე სოციალურ ქსელში სხდომის მიმდინარეობისას.

შემთხვევა 12 ნოემბერს მოხდა. ამ დღეს გირჩი — მეტი თავისუფლების აქტივისტებმა საქართველოს ექვს ქალაქში, სუს-ის შენობებთან აქცია-პერფორმანსები გამართეს. ისინი სრულად პროპორციულ 2%-იან საარჩევნო სისტემას, რიგგარეშე არჩევნებს გაზაფხულზე ჩატარებას და ექსპრეზიდენტ მიხეილ სააკაშვილის სამოქალაქო კლინიკაში გადაყვანას ითხოვდნენ. ამ დღეს მახარაძის მსგავსად პარტიის არაერთი აქტივისტი დააკავეს, მათ შორის, მწერალი ტორესა მოსი და პარტიის უკვე ყოფილი წევრი, იმედა კლდიაშვილი. ამ დაკავებების გასაპროტესტებლად 22 ნოემბერს გირჩი — მეტი თავისუფლების წევრები სუს-ის შენობასთან სახელმწიფო უსაფრთხოების სამსახურის უფროსის, გრიგოლ ლილუაშვილის ნიღბებით მივიდნენ.