პარტია საქართველოსთის თავმჯდომარე, ექსპრემიერი გიორგი გახარია აცხადებს, რომ პრეზიდენტ სალომე ზურაბიშვილის ინიციატივა საყოველთაო თანხმობის მიღწევის შესახებ "ამბიციური ტვირთია". ის ამბობს, რომ ამ იდეის განხორციელებაში სალომე ზურაბიშვილს ყველა უნდა დაეხმაროს.

"საკმაოდ ამბიციური ტვირთი იტვირთა ქალბატონმა პრეზიდენტმა და ყველამ უნდა მადლობა გადავუხადოთ, ყველამ. იმიტომ, რომ ამას ძაან დიდი მნიშვნელობა აქვს ქვეყნისთვის. მოგეხსენებათ, მე ყოველთვის ვამბობდი, რომ რადიკალიზაცია და პოლარიზაცია არის ის, რაც ქვეყანას წარსულში აბრუნებს და არ მიყავს წინ. ამიტომ, უნდა გავაკეთოთ მარტივი რამ — ყველამ უნდა ვეცადოთ, ქალბატონი პრეზიდენტის ინიციატივას დავეხმაროთ იმ შესაძლებლობებით, რაც ჩვენ გვაქვს", — განაცხადა გახარიამ.

კითხვას, რა შესაძლებლობები აქვს პირადად მას და მის პარტიას, გახარიამ ასე უპასუხა:

"ჩვენ გვაქვს ის შესაძლებლობები, რომ ყველა ჩვენი წამრომადგენლობა საკანონმდებლო დონეზე, ჩვენი ინიციატივები, ყველაფერი იქნება განსაზღვრული იმით, რომ ქალბატონ პრეზიდენტს ამ მისიის შესრულებაში დავეხმაროთ, რომელიც მარტივ არ იქნება. რა თქმა უნდა, ჩვენ ფრთხილი ოპტიმიზმით უნდა ვუპასუხოთ".

გიორგი გახარია ამბობს, რომ ეროვნული შეთანხმების მიღწევა შესაძლებელია მხოლოდ ზეპარტიულ საკითხებზე.

"კონკრეტული ადამიანების საკითხის დაყენება ეროვნული შერიგების მიღწევის კონტექსტში, ზუსტად რომ, აფერხებს ამ შეთანხმებას. ეროვნული შეთანხმება უნდა მოხდეს ზეპარტიულ საკითხზე, როგორც არის ქვეყნის დემოკრატიული განვითარება, ქვეყნის საგარეო ორიენტაცია, მართლმსაჯულების სისტემა, დეოკუპაცია და კიდევ ბევრი რამ. ეს არის ზეპარტიული საკითხები, რომელზეც უნდა მოვახდინოთ კონსოლიდაცია", — განაცხადა მან,

გიორგი გახარიამ, ასევე, განაცხადა, რომ ექსპრეზიდენტ მიხეილ სააკაშვილის პატიმრობასთან დაკავშირებით აზრი არ შეუცვლია.

რამდენიმეკვირიანი პაუზის შემდეგ გახარია საჯაროდ დღეს, პატრიარქთან ვიზიტისას გამოჩნდა. ის ამბობს, რომ ილია მეორესთან აღსაყდრებიდან 44 წლისთავის მისალოცად მივიდა.

გაიგე მეტი: