საქართველოს რკინიგზის მატარებლები შეფერხებით მოძრაობენ. მოქალაქეები წერენ, რომ საათობით უწევთ გაჩერებულ მატარებელში ყოფნა და დანიშნულების ადგილას დაგვიანებით ჩადიან.

როგორც On.ge-ს რკინიგზის პრესსამსახურში უთხრეს, შეფერხება ძაბვის ხაზის დაზიანების გამოა და რკინიგზა საგანგებო რეჟიმში მუშაობს.

"დილით მოხდა ელექტრო პრო ჯორჯიას ძაბვის ხაზის დაზიანება, შესაბამისად, სამგზავრო მატარებლები გაჩერდნენ, თუმცა მალე დაიძრა ყველა მატარებელი, რომლებიც გაჩერებული იყო. ვინაიდან არის უამინდობა და ძაბვის ხაზები არის დაზიანებული, რკინიგზა საგანგებო რეჟიმში მუშაობს და მატარებლები მოძრაობენ საგანგებო რეჟიმში. შესაბამისად, გარკვეული შეფერხებები რეისზე მყოფ მატარებლებს ექმნება. თუმცა ეს შეფერხებები არის ხოლმე ძალიან მოკლე ვადიანი", — გვითხრეს პრესსამსახურში.

ერთ-ერთი მგზავრის თქმით, მატარებელი რომელიც 8 საათზე გავიდა თბილისიდან, ბათუმში ახლა [17:30] ჩავიდა და მატარებელი 4-ჯერ გაჩერდა.

"სრულიად მოუმზადებლები იყვნენ, თითქოს ზამთარში თოვლი ძალიან უცხოა. კარი გაეღოთ და ჰაერი შემოეშვათ თუ არა, მაგაზეც ვიღაცისგან ელოდებოდნენ დასტურს", — განუცხადა მგზავრმა On.ge-ს.

ფოტო გადაღებულია ბათუმი-თბილისის მატარებლის გაჩერების შემდეგ