მაყურებლის დიდხნიანი ლოდინი დასასრულს უახლოვდება: ეიფორიის მე-2 სეზონის გამოსვლამდე სულ ცოტა ხანი გვაშორებს. 9 იანვრის პრემიერამდე HBO-მ ახალი ტრეილერი შემოგვთავაზა, რომელიც იმაზე შთამბეჭდავ სანახაობას გვიმზადებს, ვიდრე ველოდით.

მეორე სეზონში, რა თქმა უნდა, ზენდეიას ვიხილავთ, რომელმაც სერიალში შესრულებული როლისთვის ემი მიიღო. ჩვენთვის უკვე კარგად ნაცნობ სახეებთან ერთად ახალ პერსონაჟებსაც გავიცნობთ.

როგორც მოკლე აღწერაში ვკითხულობთ, სიუჟეტი "17 წლის რუს ირგვლივ განვითარდება, რომელიც სიყვარულის, დანაკარგისა და ნარკოდამოკიდებულების წნეხის მიუხედავად, იმედის პოვნას ცდილობს". მე-2 სეზონის შინაარსის ზუსტი დეტალები ჯერჯერობით უცნობია, თუმცა ტრეილერი ცხადყოფს, რომ ახალი სეზონი იმედს არ გაგვიცრუებს.

ეიფორიის მეორე სეზონის გადაღებები 2020 წლის მარტში უნდა დაწყებულიყო, თუმცა პანდემიის გამო გეგმები შეიცვალა, ამიტომ პრემიერის თარიღი გადაიდო. გაუთვალისწინებელი ცვლილებების გამო გასულ ზამთარს ორი სპეციალური ეპიზოდი გამოუშვეს, რათა ფანების მოლოდინი შეემსუბუქებინათ.

ახალმა ტრეილერმა მე-2 სეზონის მოლოდინი კიდევ უფრო გაგვიმძაფრა, თუმცა ისღა დაგვრჩენია, საყვარელ პერსონაჟებთან შეხვედრამდე დარჩენილი დღეები მოთმინებით ვითვალოთ.