სულ რამდენიმე დღის წინ შედგა Spider-Man: No Way Home-ის (სპაიდერმენი: სახლისკენ გზა არ არის) პრემიერა და უკვე შეძლო მსოფლიოს ალაპარაკება.

იმასთან ერთად, რომ მარველის ახალმა ფილმმა როგორც მაყურებლების, ისე კრიტიკოსების დიდი ნაწილის დადებითი შეფასებები დაიმსახურა, ამავდროულად კინოგაქირავებაშიც უზომოდ წარმატებული აღმოჩნდა: ფილმის შემოსავლებმა პირველ ორ დღეში $600,8 მილიონი შეადგინა.

სპაიდერმენის შესახებ გადაღებულმა ახალმა ფილმმა მარტო აშშ-სა და კანადაში შეძლო $260 მილიონის მოგროვება, დანარჩენ მსოფლიოში კი შემოსავლებმა $340,8 მილიონს გადააჭარბა.

ფილმის გამოსვლამდე ვარაუდობდნენ, რომ მისი შემოსავლები პირველი კვირის განმავლობაში $130-დან $150 მილიონამდე იქნებოდა, რეალურად კი, პრემიერის დღესვე უკვე შემოსავლებმა $121 მილიონს გადააჭარბა.

აღსანიშნავია ის ფაქტიც, რომ პანდემიის გამო კინოთეატრებში მაყურებელთა რაოდენობა საგრძნობლად შემცირდა, რისი გათვალისწინებითაც ერთიორად უფრო დასაფასებელია ფილმის სპაიდერმენი: სახლისკენ გზა არ არის წარმატება.

მარველი ახალი ბლოკბასტერი ამ შემოსავლებით უკვე 2021 წლის ყველაზე მაღალშემოსავლიანი ფილმი გახდა, თუმცა ვარაუდობენ, რომ შესაძლოა, ყველა დროის რეკორდიც მოხსნას და ისეთ ფილმებსაც გადაუსწროს, როგორებიცაა შურისმაძიებლები: დასასრული და უსასრულობის ომი.

როგორც განმარტავენ, ეს შედეგი იმის დამსახურებაა, რომ მარველის სამყაროს მილიონობით გულშემატკივარს სურდა, სპოილერები აერიდებინა თავიდან, ამიტომ რაც შეიძლება მალევე ნახეს ფილმი.

როგორც ჩანს, ეს მხოლოდ დასაწყისია და სპაიდერმენი კიდევ შეძლებს ჩვენს გაოცებას.