საპარლამენტო უმრავლესობის, ქართული ოცნების წევრი, ეკა ბესელია მიიჩნევს, რომ პრეზიდენტმა საკუთარ გამოსვლაში რეალობისგან "სრულიად საპირისპირო" აქცენტები დასვა. ამის შესახებ ბესელიამ პრეზიდენტის გამოსვლის შემდეგ განაცხადა.

"სამწუხაროდ აქცენტები გაკეთდა არასწორი, მიკერძოებული, არაობიექტური, არანეიტრალური, როგორც მხარე ისე წარმოჩინდა პრეზიდენტი, რაც ძალიან სამწუხაროა. როდესაც უმრავლესობას უწოდებ საკუთარ თავში ჩაკეტილ, დიალოგის არმოსურნე და ვითარებას აფასებ როგორც საფრთხის შემცველს, ეს მაფიქრებინებს, რომ მისი აქცენტები იყო აცდენილია რეალობას," - აღნიშნა ბესელიამ და დასძინა, რომ საქართველო პრეზიდენტმა არ გაიხსენა ის დინამიკა, რომლითაც საქართველო რეგიონსა და აღმოსავლეთ პარტნიორ ქვეყნებში ლიდერია.