დღეს, 28 მაისს, დავით აღმაშენებლის სახელობის საქართველოს თავდაცვის აკადემიის 23 წლის იუბილეა. ეს დღე იუნკრებს საქართველოს პრეზიდენტმა, გიორგი მარგველაშვილმაც მიულოცა და განაცხადა, რომ დღეს ქართველი ჯარისკაცები გამორჩეული ადამიანები არიან, რომლებზეც სწორება საზოგადოების სხვა ნაწილს აქვს:

"თქვენ უმნიშვნელოვანესი მისია გენიჭებათ - უნდა დაიცვათ ჩვენი მოქალაქეების მშვიდობა, თქვენ უნდა დაიცვათ ქვეყნის განვითარება, თქვენ უნდა უზრუნველყოთ ურთულეს ვითარებაში ჩვენი ქვეყნის დაცულობა.

მე არაერთხელ მითქვამს და დღესაც გავიმეორებ, რომ როგორც მხედართმთავრების, ასევე ჯარისკაცის ყველაზე დიდი გამარჯვება არის, როდესაც ომი მოგებულია ბრძოლის გარეშე. ეს ის მიზანია, რომელიც გვაერთიანებს პოლიტიკოსებსაც და სამხედრო მოსამსახურეებსაც".

პრეზიდენტის თქმით, სახელმწიფოსთვის ძალიან მნიშვნელოვანია, რომ ქვეყანაში იყოს ნაწილი საზოგადოების, რომელზეც დანარჩენები სწორებას გააკეთებენ. მისი განმარტებით, ნელ-ნელა საზოგადოების ასეთ ფენად ყალიბდებიან ქართველი ჯარისკაცები და ქართული შეიარაღებული ძალები.

„ეს იმ გმირების დამსახურებაა, რომელთაც როგორც ქვეყნის შიგნით, ასევე საერთაშორისო მისიებში, საკუთარი სისხლით, საკუთარი ჯანმრთელობის ფასად შექმნეს ისეთი იმიჯი ჩვენს საზოგადოებაში, რომ ფორმაში ჩაცმული ადამიანი პატივისცემის ღირსია.

ბუნებრივია, მათი სიცოცხლე, მათი ღვაწლი, მათი გმირობა თქვენს მხრებზე გადმოდის და ეს ვალდებულება, რომ ემსახუროთ მათ სახელს, მათ ხსოვნას და ეს მაღლა აწეული დროშა არ დაუშვათ, თითოეულ იმ ადამიანზე გადმოდის ვისაც სამხრეები უკეთია".

საქართველოს პრეზიდენტმა და თავდაცვის მინისტრმა სამსახურებრივი მოვალეობის ღირსეულად შესრულებისათვის თავდაცვის აკადემიის პირადი შემადგენლობა დააჯილდოვეს.