შინაგან საქმეთა სამინისტროს გააკავეს პირები, რომლებმაც ფინანსური დავის გადასაწყვეტად ე.წ. ქურდული სამყაროს წევრებს მიმართეს. დაკავებულები არიან თავად ქურდული სამყაროს წევრებიც. თბილისში, ქუთაისში, ზესტაფონსა და თერჯოლაში ერთდროულად განხორციელებული საგამოძიებო მოქმედებების შედეგად ჯამში 5 ადამიანი დააკავეს.

როგორც უწყებაში განმარტავენ, სადაო თანხის, 50 000 ლარის გაყოფაში დახმარების თხოვნით მხარეებმა ე.წ. ქურდული სამყაროს წევრებს მიმართეს, რომლებმაც, თავის მხრივ დახმარება საზღვარგარეთ მყოფ ქართველ კანონიერ ქურდებს სთხოვეს.

"ქურდული სამყაროს წევრებმა, მოდავე მხარეებთან ერთად, ფინანსური დავის ქურდული წესით გარჩევისთვის რამდენიმე შეხვედრა გამართეს თბილისში, წინასწარ დაქირავებულ ბინაში, ასევე, ერთ-ერთი მოდავე მხარის ოფისში. შეხვედრებზე ქურდული სამყაროს წევრებმა მოუსმინეს დაპირისპირებულ მხარეებს და დაავალეს, სადავო ფულიდან — 50 000 ლარიდან ობიექტურად განსაზღვრული კუთვნილი წილების ერთმანეთისთვის გადახდა, ასევე, ორივე მხარეს მოსთხოვეს მათ დავაში ჩართული კანონიერი ქურდებისათვის გარკვეული თანხის გაგზავნა.

მოდავე მხარეები ვერ შეთანხმდნენ კუთვნილ წილებზე, რის შემდგომაც ქურდული სამყაროს წევრებმა ისინი დაავალდებულეს, ჩასულიყვნენ საბერძნეთში მყოფ კანონიერ ქურდებთან, რომლებიც უკვე ქურდული გარჩევის საფუძველზე მიიღებდნენ საბოლოო გადაწყვეტილებას", — აცხადებენ შსს-ში.

გამოძიება ქურდული სამყაროს წევრობისა და ქურდული სამყაროს წევრისთვის მიმართვის ფაქტზე, საქართველოს სსკ-ის 223-ე პრიმა მუხლის 1-ლი ნაწილით და 223-ე პრიმა-4 მუხლის 1-ლი ნაწილით მიმდინარეობს. დანაშაული 7-დან 10-წლამდე ვადით თავისუფლების აღკვეთას ითვალისწინებს.