ჯერ კიდევ მოქმედი ჯანდაცვის მინისტრი, ეკატერინე ტიკარაძე გადადგომამდე ცოტა ხნით ადრე აცხადებს, რომ პანდემიის მართა "თითქმის ავტომატურ რეჟიმზეა". მან ხაზი გაუსვა, რომ კორონავირუსის გავრცელებისას ჯანდაცვის სისტემა რთულ მდგომაროებაში იყო, თუმცა ახლა ყველა რგოლი ისე მუშაობს, რომ სამინისტროს არ გაუჭირდება უფრო რთული სიტუაციების მართვაც.

"ჯანდაცვის სისტემა იყო საკმაოდ რთულ მდგომარეობაში, როდესაც პანდემიის დასაწყისი გვქონდა, ვინაიდან ჩვენ არ გვქონდა შესაბამისი მზაობა ამისათვის. გამოვიარეთ საკმაოდ რთული პერიოდი, თუმცა დღესდღეობით, შეიძლება ითქვას, რომ პანდემიის მართვა არის თითქმის ავტომატურ რეჟიმზე, ვინაიდან ყველა ის რგოლი, რომელიც უნდა ზრუნავდეს ჩვენი მოქალაქეების ჯანმრთელობაზე, მუშაობს ეფექტურად.

ამაში ვგულისხმობ ტესტირების პროცესის შედეგებს, ტესტირების პროცესის შემდეგ იდენტიფიცირებული პაციენტების მართვას როგორც ონლაინ კლინიკების მხრიდან, ასევე მათ გადამისამართებას იმ შესაბამისი სირთულით, რომლითაც პაციენტი იმ მომენტში იმყოფება, ჰოსპიტალურ სექტორში, ან სასტუმროებში. სასწრაფოს სისტემაც, ასევე, არის აწყობილი. ჩვენ არა გვაქვს დაყოვნებული ზარები და აქედან გამომდინარე, მე ვთვლი, რომ ის სისტემა, რომელიც დღეს ფუნქციონირებს, შეძლებს გაუმკლავდე სხვა უფრო რთულ სიტუაციასაც კი", — განაცხადა ტიკარაძემ.

9 დეკემებერ ეკატერინე ტიკარაძემ განაცხადა, რომ მინისტრის პოსტს ტოვებს. 12 დეკემბერს, მინისტრის მოადგილემ, თამარ გაბუნიამ განაცხადა, რომ ტიკარაძე თანამდებობაზე წლის ბოლომდე იქნება. მანვე აღნიშნა, რომ არ იცოდა, თუ ის გადადგომას აპირებდა. ჯანდაცვის მინისტრის თანამდებობაზე რამდენიმე კანდიდატი განიხილება, მათ შორის პარლამენტის ყოფილი თავმჯდომარე, არჩილ თალაკვაძე.

გაიგე მეტი: