სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა ქრთამის აღების და ქრთამის აღებაში დახმარების ბრალდებით ზუგდიდის მუნიციპალიტეტის გამგეობის წარმომადგენელი და ერთი მოქალაქე დააკავეს.

გამოძების ინფორმაციით, ზუგდიდის მუნიციპალიტეტის გამგეობის თანამშრომელმა ამავე მუნიციპალიტეტის სოფელ ეწერში ყოფილი ამბულატორიის შენობის აუქციონზე გატანასა და გამარჯვებაში დახმარების სანაცვლოდ ერთი მოქალაქის შუამავლობით, მოქალაქეს ქრთამის სახით 15 ათასი ლარი მოსთხოვა.

"მოთხოვნილი თანხის ნაწილი - 5 ათასი ლარი მათ მოქალაქეს წინასწარ გამოართვეს, რა დროსაც ისინი ანტიკორუფციული სააგენტოს თანამშრომლებმა ბრალდებულის სახით დააკავეს. გადაცემული თანხა 5ათასი ლარი ამოღებულია ნივთმტკიცებად," - აცხადებენ სუს-ში.

უწყებაში გამოძიება ქრთამის აღების და ქრთამის აღებაში დახმარების მოტივით მიმდინარეობს (სისხლის სამართლის კოდექსის 338-ე მუხლის მე-2 ნაწილის "ბ" ქვეპუნქტი). საქართველოს კანონმდებლობით, დიდი ოდენობით ქრთამის აღება ისჯება თავისუფლების აღკვეთით ვადით შვიდიდან თერთმეტ წლამდე.

როგორც სუს-ში აცხადებენ, თბილისის საქალაქო სასამართლოს გადაწყვეტილებით საქმეზე დაკავებულ პირებს აღკვეთის ღონისძიების სახით პატიმრობა შეეფარდათ.