დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, დავით სონღულაშვილმა აზარტული თამაშების კანონპროექტის განხილვისას სათამაშო ბიზნესის წარმომადგენლებს განუცხადა, რომ მოუწევთ იმ მოცემულობაზე გადაწყობა, რასაც სახელმწიფო სთავაზობთ. მისი თქმით, კანონპროექტის განხილვის შესახებ მიღებული გადაწყვეტილება პოლიტიკურია და არა ეკონომიკური, რადგან საზოგადოების ინტერესიდან გამომდინარეობს და ლუდომანიის პრობლემას ეხება.

"თქვენ ვერ მოგეწონებათ ეს კანონპროექტი ზუსტად ვიცი. აქედან გამომდინარე, მოუწევს ბიზნესს იმ მოცემულობაზე გადაწყობა, რა მოცემულობასაც სთავაზობს სახელმწიფო. ეს არის მოცემულობა და უნდა გამოვიდეთ აქედან, იმიტომ რომ ეს ემსახურება საზოგადოების ინტერესებს. ამის შიგნით რაც არ უნდა დეტალურ მსჯელობაში გავყვეთ, ეს არის პრინციპი მიდგომის, ამიტომ, არაფერს არ მოგვცემს დეტალური მსჯელობა", — განუცხადა დეპუტატმა ბიზნესის წარმომადგენლებს.

სონღულაშვილმა აღნიშნა, რომ სახელმწიფო იმიტომ არის სახელმწიფო, რომ "მიიღოს პრინციპული პოლიტიკური გადაწყვეტილებები". მისივე თქმით, თუ კანონპროექტს არ ექნება შედეგი, ამ შემთხვევაში მოხდება მისი შემდგომი განვითარება.

"ეკონომიკურ გათვლებთან მიმართებით, რაც არ უნდა ვიმსჯელოთ, ბიუჯეტს უფრო მეტი დააკლდება თუ უფრო ნაკლები დააკლდება, აქ ასე უფრო მეტად ჩაიკეტება საკითხი, თუ უფრო ნაკლებად ჩაიკეტება გადარიცხვები, ეს არის მეორეხარისხოვანი, იმიტომ რომ თუ შევამჩნიეთ, რომ ეს კანონპროექტი ვერ არეგულირებს და ვერ ემსახურება იმ მიზნებს, რა მიზანიც აქვს, აუცილებლად მოხდება შემდგომი განვითარება კანონპროექტის", — ამბობს ის.

სათამაშო ბიზნესის წარმომადგენლების კრიტიკული დამოკიდებულების პასუხად სონღულაშვილი ასევე აცხადებს, რომ "ეს არის სახელმწიფოს გადაწყვეტილება, მიიღეთ ისეთი, როგორიც არის, ეს არის მოცემულობა".

პარლამენტი დაჩქარებული წესით განიხილავს კანონპროექტს, რომელიც აზარტულ თამაშებთან დაკავშირებით კანონის გამკაცრებას ითვალისწინებს. კომიტეტის სხდომაზე გირჩის ერთ-ერთმა ლიდერმა, ალექსანდრე რაქვიაშვილმა განაცხადა, რომ თუ აზარტულ თამაშებზე კანონს მიიღებენ, ამით ადამიანური ტრაგედიები უფრო გაიზრდება. რაქვიაშვილის განცხადებით, ამ კანონის მიღებით ადამიანები თამაშს თავს კი არ დაანებებენ, არამედ მოძებნიან არალეგალურ გზებს, რის შედეგადაც აზარტულ თამაშებზე დამოკიდებულების პრობლების გამოვლენის, ასევე, მოთამაშეების უფლებების დაცვის ნაკლები შანსი იქნება.