ქართული ოცნების აღმასრულებელი მდივანი მამუკა მდინარაძე პარტიის შიგნით შესაძლო დაპირისპირებაზე ინფორმაციას არ ადასტურებს და ირწმუნება, რომ მათი გუნდი ასეთი ერთიანი არასდროს ყოფილა. ამასთან, ის პრემიერიმინისტრ ირაკლი ღარიბაშვილის მიერ თანანმდებობის შესაძლო დატოვებასთან დაკავშირებით აცხადებს, რომ ამაზე ფიქრის არანაირი საფუძველი არ არსებობს.

"არათუ დაპირისპირება გუნდის შიგნით, არამედ, პირიქით, ასეთი მყარი ბოლო წლების განმავლობაში გუნდის შიგნით ლიდერების ურთიერთობა ნამდვილად არ ყოფილა. რაც ილაპარაკა მის განცხადებაში [ეკატერინე ტიკარაძემ] და მერე ჩართვაც ჰქონდა, ერთი-ერთში იგივე მიზეზებზე საუბრობდა ამ ხნის განმავლობაში. ის ორ წელზე მეტი დროის განმავლობაში ხელმძღვანელობდა ურთულეს პერიოდში, წნეხი, ტვირთი ჯანდაცვის სფეროზე. ურთულესია, ძალიან დამღლელია და საპასუხისმგებლოა და ნებისმიერ ადამიანს გააჩნია რესურსი, რომლის შემდეგ ფიქრობს, რომ მან რაც შეეძლო გააკეთა და ახლა უნდა წავიდეს და სხვამ გააგრძელოს. დაახლოებით ეს ვორდინგი ჰქონდა", — განაცხადა მდინარაძემ წინანდალში, სადაც მმართველი პარტიის ლიდერები იკრიბებიან.

ჯანდაცვის მინისტრი, ეკატერინე ტიკარაძე თანამდებობიდან 11 დეკემბერს გადადგა. ამის შესახებ მან ქართული ოცნების ოფისში სპეციალურად გამართულ ბრიფინგზე განაცხადა. უფრო ზუსტად, ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ სწორად მიიჩნია საქმიანობის პარტიის პოლიტსაბჭოში გაგრძელება. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.

12 დეკემბერს, მისმა მოადგილემ, თამარ გაბუნიამ განაცხადა, რომ ტიკარაძე თანამდებობაზე წლის ბოლომდე იქნება. მანვე აღნიშნა, რომ გადადგომაზე არ იცოდა, თუ ის გადადგომას აპირებდა.

ეკატერინე ტიკარაძისა და პრემიერმინისტრ ირაკლი ღარიბაშვილის შესაძლო დაპირისპირებაზე მედია რამდენიმე დღე აქტიურად საუბრობდა. ამბობდნენ, რომ დაპირისპირება კორონავირუსის მართვაზე განსხვავებულმა ხედვებმა გამოწივია. ამ თემაზე ჯანდაცვის მინისტრს რამდენჯერმე ჰკითხეს, თუმცა ის პასუხს თავს ირიდებდა. გარდა ამისა, მინისტრს ეკითხებოდნენ, იყო თუ არა დაპირისპირების და კამათის მიზეზი მწვანე პასპორტების საკითხი, რაზეც ის ამბობდა, რომ არა დაპირისპირება, არამედ განხილვა ჰქონდათ.

ტიკარაძემ რამდენჯერმე თქვა ისიც, რომ არ ემხრობოდა მთავრობის დაწესებულ უვადო მწვანე პასპორტის იდეას და როგორც ჯანდაცვის სფეროს წარმომადგენელი, ვირუსის მართვის უფრო მკაცრი ზომების მომხრე იყო.