ჩვენ უკვე ვიცით იმ მსახიობების სია, ვისაც ჰარი პოტერში უნდა ეთამაშათ, მაგრამ საბოლოოდ მათ მაგივრად სხვები დაამტკიცეს.

მაგალითად, ნაომი უოტსი, ტილდა სუინტონი, ჰიუ გრანტი, როზამუნდ პაიკი, ქეით უინსლეტი, ტიმ როტი და ა.შ.

ამ მსახიობებს შორის არის იან მაკკელენიც, რომელმაც სულ ცოტა ხნის წინ, გაამხილა მიზეზი, რის გამოც დამბლდორის როლზე უარი თქვა.

ინგლისელი მსახიობის უარის მიზეზი რიჩარდ ჰარისი გახდა, რომელიც ჰოგვორტსის დირექტორის როლს პოტერიადას პირველ და მეორე ნაწილებში გარდაცვალებამდე ასრულებდა.

იან მაკკელენის განმარტებით, რიჩარდ ჰარისმა მას ერთხელ ტექნიკურად არაჩვეულებრივი, მაგრამ თავდაჭერილი მსახიობი უწოდა. იან მაკკელენის გადაწყვეტილებაზე სწორედ ამ ფრაზამ იქონია გავლენა.

"ჰარისმა თავის დროზე არაჩვეულებრივი, მაგრამ თავდაჭერილი მსახიობი მიწოდა, ამიტომ როლს ნამდვილად ვერ გადავიბარებდი იმ მსახიობისგან, რომელსაც არ მოვწონდი", - ამბობს მაკკელენი.

იანის უარის შემდეგ ამ როლზე მაიკლ გამბონი დაამტკიცეს.

"როდესაც მაიკლს ჰარი პოტერში ვხედავ, სულ მგონია, რომ მე ვარ", - იხუმრა მაკკელენმა.