არასამთავრობო ორგანიზაციები პარლამენტს მოუწოდებენ, ღიად პრორუსული, ჰომოფობიური და ქსენოფობიური Alt-Info-ს და მსგავსი, პრორუსული დაჯგუფებების სახელმწიფო ინტერესების საწინააღმდეგო ქმედებები და ფინანსური კავშირები შეისწავლოს. ამის შესახებ მათ ერთობლივი განცხადება გაავრცელეს.

ორგანიზაციების თქმით, ეს მოკვლევა პარლამენტის დეზინფორმაციისა და პროპაგანდის საკითხებზე თემატური მოკვლევის ჯგუფის ანგარიშის რეკომენდაციების გათვალისწინებით უნდა განხორციელდეს. NGO-ები, ასევე, მოუწოდებენ პროკურატურას და შესაბამის უწყებებს, რომ ძალადობის ორგანიზატორების მიმართ შესაბამისი კანონით გათვალისწინებული ღონისძიებები გაატარონ.

ერთობლივ განცხადებაში ვკითხულობთ, რომ საქართველოში ანტიდასავლური, პრორუსული ძალის გაძლიერება და საბოლოოდ ხელისუფლებაში მოსვლა, რუსეთის ინტერესებშია, რადგან ქვეყნის ევროატლანტიკურ სტრუქტურებში გაწევრიანება არ დაუშვას.

"Alt-info რადიკალური დაჯგუფება, რომელიც გამოირჩევა ძალადობრივი ქმედებებით და ძალადობის წამახალისებელი სიძულვილისა და მუქარის ენით, წლების განმავლობაში საქართველოს მოკავშირეებისა და კონსტიტუციით აღიარებული დასავლური, ევროატლანტიკური კურსის წინააღმდეგ პროპაგანდირებს და მათ საქართველოს შიდა საქმეებში უხეშ ჩარევაში, საქართველოს მიმართ კოლონიალიზმში, ქართული ტრადიციებისა და ქრისტიანობის წინააღმდეგ ბრძოლაში ადანაშაულებს. Alt-info მიიჩნევს, რომ საქართველოს ევროპული მომავალი არ აქვს და საქართველოში ლიბერალური დემოკრატიის დასრულებასა და დასავლეთთან პარტნიორული ურთიერთობების შეწყვეტას ღიად მოითხოვს.

ამასთან, Alt-info საზოგადოებას მცდარ დილემას უყენებს და მოქალაქეებს არწმუნებს, რომ მათ არჩევანი უნდა გააკეთონ საქართველოს თურქეთის გავლენის სფეროდ გადაქცევასა/ისლამიზაციასა და რუსული გავლენის სივრცეში დაბრუნებას შორის. Alt-info მოცემულ ყალბ დილემაზე პასუხად რუსეთის გავლენის სივრცეში დაბრუნებას მიიჩნევს და ამტკიცებს, რომ საქართველოს გადარჩენა მხოლოდ რუსეთს შეუძლია", — ვკითხულობთ განცხადებაში.

ორგანიზაციები საგანგაშოდ მიიჩნევენ Alt-info მცდელობას, რომ შექმნას ყალბი ილუზია, თითქოს, ტერიტორიული მთლიანობის აღდგენისათვის საქართველო რუსული უსაფრთხოებისა და ეკონომიკურ სისტემებში უნდა შევიდეს. NGO-ები ასევე საუბრობენ, რომ წარსულში პატრიოტთა ალიანსი და დემოკრატიული მოძრაობა — ერთიანი საქართველო ანტიდასავლური და პრორუსული ინტერესების გასატარებლად ყალბი ნეიტრალიტეტისა და სამხედრო მიუმხრობლობის იდეებს იყენებდნენ.

ორგანიზაციები, ასევე, მიუთითებენ, რომ 5 ივლისს ძალადობისკენ მოწოდებებისა და საჯარო განცხადებების მიუხედავად, გამოძიება არ დაწყებულა და მეტიც, დაუსჯელობით წახალისებულმა ორგანიზატორებმა პოლიტიკური პარტიაც დააფუძნეს.

ხელმომწერი ორგანიზაციები არიან:

• საქართველოს რეფორმების ასოციაცია (GRASS);
• მედიის განვითარების ფონდი (MDF);
• გამომძიებელ ჟურნალისტთა გაერთიანება აი, ფაქტი;
• ინფორმაციის თავისუფლების განვითარების ინსტიტუტი (IDFI);
• სამართლიანი არჩევნებისა და დემოკრატიის საერთაშორისო საზოგადოება (ISFED);
• საქართველოს ჟურნალისტური ეთიკის ქარტია;
• ტოლერანტობის და მრავალფეროვნების ინსტიტუტი (TDI);
• ომისა და მშვიდობის გაშუქების ინსტიტუტი — IWPR საქართველო.

ძალადობრივმა, ჰომოფობიურმა და პრორუსულმა Alt-Info-მ პარტია 20 ნოემბერს დააფუძნა, რომელსაც კონსერვატიული მოძრაობა უწოდეს. საჯარო რეესტრმა პარტია ოფიციალურად 7 დეკემბერს დაარეგისტრირა. რეესტრზე მითითებული ინფორმაციის მიხედვით, კონსერვატიულ მოძრაობად წოდებული პარტიის თავმჯდომარე 5 ივლისის ძალადობრივი აქციის ერთ-ერთი ორგანიზატორი ზურაბ მახარაძეა, გენერალური მდივანი კი, გიორგი ქარდავა.

მანამდე, 25 ნოემბერს საჯარო რეესტრმა კონსერვატიული მოძრაობის რეგისტრაცია შეაჩერა და მიზეზად დოკუმენტაციის შევსებისას დაშვებული რამდენიმე შეცდომა დაასახელა. მათ ხარვეზის აღმოსაფხვრელად 10 დღე მიეცათ. რეესტრიდან ვიგებთ, რომ 2 და 6 დეკემბერს Alt-Info-მ დამატებითი დოკუმენტები წარადგინა.