ზურმუხტის, ლალისა და საფირონის საგანძური, რომელიც ათწლეულების განმავლობაში საფრანგეთის მწვერვალ მონბლანის მახლობელ მყინვარზე იყო დამარხული, აღმოჩენიდან რვა წლის შემდეგ ადგილობრივმა ხელისუფლებამ მის მპოვნელ მთამსვლელს გაუყო.

მთამსვლელი ყუთს, რომელშიც ძვირფას ქვები ინახებოდა, 2013 წელს გადააწყდა, როცა მან ამ უკაცრიელ ადგილას ჩამოვარდნილ ინდურ თვითმფრინავს მიაგნო.

მთამსვლელი და მთავრობა განძს ორ თანაბარ ნაწილად გაიყოფს და თითოეულს 169 ათასი დოლარის ღირებულების ძვირფასი ქვები შეხვდება. პოლიციამ მთამსვლელი კეთილსინდისიერების გამოც შეაქო, რადგან ის კანონის შესაბამისად მოიქცა და განძის პოვნის შესახებ მაშინვე განაცხადა.

როცა ეს ამბავი მთამსვლელს აცნობეს, მან Le Parisien-თან ინტერვიუში განაცხადა, რომ გულწრფელობას არ ნანობს და თანხას სახლის გასარემონტებლად გამოიყენებს.

Air India-ის ორი თვითმფრინავი მონბლანის მახლობლად 1950 და 1960 წელს ჩამოვარდა. მთამსვლელები წლების განმავლობაში ნამსხვრევებს, ბარგსა და ადამიანთა ნაშთებს პოულობდნენ.

მთავრობა თვლის, რომ ძვირფასი ქვები 1966 წელს ჩამოვარდნილ თვითმფრინავს გადაჰქონდა. ეს Boeing 707 იყო, რომელიც მუმბაიდან ნიუ-იორკში მიფრინავდა და 1966 წლის 24 იანვარს მონბლანის სამხრეთ-დასავლეთ მხარეს ჩამოვარდა. ამ კატასტროფას 177 ადამიანის სიცოცხლე ემსხვერპლა.