უკრაინის რადას დეპუტატი, ლიზა იასკო აცხადებს, რომ ხელისუფლებას მიხეილ სააკაშვილის სიკვდილი, მისთვის მრავალწლიანი პატიმრობის შეფარდება სურს და მოუწოდებს, რომ თუ ის საქართველოში არ სჭირდებათ, დაუბრუნონ უკრაინას.

"გუშინდელ სასამართლოზე ჩვენ ვნახეთ, რომ არის ბრალდებები და ჩანს, რომ ხელისუფლებას სურს მიხეილ სააკაშვილის მოკვლა, სურს მისი პატიმრობა მრავალი წლით. თუ თქვენ ის არ გჭირდებათ საქართველოში, დაგვიბრუნეთ უკრაინაში, ჩვენ ის გვჭირდება", — განაცხადა იასკომ.

2 დეკემბერს თბილისის საქალაქო სასამართლოში, ე.წ. პიჯაკების საქმის სასამართლო პროცესი გაიმართა, რომელსაც სააკაშვილიც ესწრებოდა. სააკაშვილს ბრალად სამსახურებრივი მდგომარეობის გამოყენებით, წინასწარი შეთანხმებით, დიდი ოდენობით სახელმწიფო ქონების გაფლანგვა ედება. საუბარია 9 მილიონ 24 ათას 667 ლარის გაფლანგვაზე. დანაშაული 7-დან 11 წლამდე თავისუფლების აღკვეთას ითვალისწინებს.