ნაციონალური მოძრაობისა და პარტიას საქართველოსთვის წევრებმა ზუგდიდში საკრებულოს დარბაზი პროტესტის ნიშნად დატოვეს და სხდომა ჩაიშალა. ქართული ოცნების დეპუტატების რაოდენობა ქვორუმისთვის საკმარისი არ აღმოჩნდა, ამიტომ ის 1 კვირით გადაიდო.

როგორც ნაციონალური მოძრაობის ზუგდიდის საკრებულოს წევრმა, ანა წითლიძემ On.ge-ს განუცხადა, პარტია არცერთ სხდომაში არ მიიღებს მონაწილეობას.

"საკრებულო ვერ აირჩა, საკრებულოს თავმჯდომარე ვერ აირჩა. ჩვენ დავტოვეთ სხდომათა დარბაზი და არცერთ სხდომაში მონაწილეობას არ ვაპირებთ", — თქვა წითლიძემ.

სხდომა ჩაიშალა ბათუმის საკრებულოშიც. დარბაზი ნაციონალური მოძრაობის 14-მა და ლელოს 1-მა დეპუტატმა დატოვა. გახარიას პარტიას კი სხდომაში მონაწილეობა საერთოდ არ მიუღია. ოპოზიციამ სხდომათა დარბაზი თბილისის საკრებულოშიც დატოვა.

დღეს, 3 დეკემბერს მეშვიდე მოწვევის საკრებულოების პირველი სხდომა იმართება, სადაც თავმჯდომარეებს, მათ მოადგილეებსა და კომისიის წევრებს ირჩევენ. რამდენიმე მუნიციპალიტეტის საკრებულოში ნაციონალური მოძრაობის წარმომადგენლებმა ახალმოწვეული საკრებულოს წევრის, ნუგზარ ფუტკარაძის ფოტოები მიიტანეს, რომლის გარდაცვალებასაც ისინი ზეწოლას უკავშირებენ.