პრემიერმინისტრ ირაკლი ღარიბაშვილის ცოლის ძმა და ყოფილი დეპუტატი ალექსანდრე თამაზაშვილი ადასტურებს, რომ ხორავას ქუჩაზე მოკლული მოზარდის მამას, ზაზა სარალიძეს აგინა. ინფორმაცია მისი მხრიდან გინებისა და მუქარის შესახებ სარალიძემ გუშინ, 30 ნოემბერს TV პირველის ეთერში გაავრცელა.

სარალიძემ განაცხადა, რომ ღარიბაშვილზე კრიტიკული პოსტების გამო ვიღაცები მიუგზავნეს და ემუქრებოდნენ. როგორც მის გავრცელებულ სქრინშოთში ჩანს, თამაზაშვილი მას შეურაცხყოფელად მოიხსენიებს.

"გულწრფელად გგულშემატკივრობ როგორც მამას, გულნატკენ მამას და ყოველთვის მჯეროდა თქვენი ნამდვილი ემოციის. რაც ეხლა თქვენ დაწერეთ და ჩემს ოჯახს შეურაცხყოფა მიაყენეთ, მაგის გამო დედას მოგი**ნავ სადაც დაგინახავ! შე ავადმყოფო", — სწერს ის სარალიძეს.

ფოტო: TV პირველი

ადვოკატის, ნესტან ლონდარიძის თქმით, ზაზა სარალიძეს შეტყობინებები გაუგზავნეს: ალექსანდრე თამაზაშვილმა, დიმიტრი ხუმარაშვილმა და Facebook-ს კიდევ ერთ-ერთმა მომხმარებელმა, რომელსაც სახელი და გვარი გარკვევით არ ეწერა. მისივე თქმით, აღნიშნული მასალა მათ პროკურატურას უკვე გადასცეს.

ამის შემდეგ, დღეს პირველ დეკემბერს თამაზაშვილმა ფეისბუქგვერდზე გამოაქვეყნა ზაზა სარალიძის 30 აგვისტოს პოსტი, რომელშიც ის ირაკლი ღარიბაშვილს და მის ოჯახს აგინებს და დაწერა, რომ თუ სარალიძის ეს პოსტი ავთენტურია, მაშინ შეგვიძლია მისი გინებაც ავთენტურად ჩავთვალოთ.