მოსამართლეთა კენჭისყრისას ლელომ და სტრატეგია აღმაშენებელმა პროტესტის ნიშნად სხდომა დატოვეს
![](http://chandler.on.ge/2021/12/01/assa.jpg)
ფოტო: კადრი ვიდეოდან/TV პირველი
ფრაქცია ლელომ და სტრატეგია აღმაშენებელმა უზენაესი სასამართლოს მოსამართლეების უვადოდ დანიშვნის კენჭისყრისას პარლამენტის სხდომა დატოვეს. მათი განცხადებით, პროცესი არალეგიტიმურია და ქართულმა ოცნებამ ამით პასუხისმგებლობა აიღო იმ უსამართლობაზე, რომელსაც "სასამართლო კლანი" სჩადიოდა.
"ამ წუთებში საქართველოს პარლამენტში მმართველმა პარტია ქართულმა ოცნებამ საბოლოოდ მოაწერა ხელი ადეიშვილი-მურუსიძე-ჩინჩალაძის სასამართლოს გადმობარებას და სრული პასუხისმგებლობის აღებას ყველა იმ უსამართლობაზე, რომელსაც სასამართლო კლანი სჩადიოდა მათ ხელისუფლებაში მოსვლამდე და აგრძელებს ჩადენას 2012 წლის შემდეგაც. ჩვენ დემარშის ნიშნად დავტოვეთ ეს პროცესი, რომელიც არის არალეგიტიმური", — განაცხადა ფრაქცია ლელოს წევრმა, ანა ნაცვლიშვილმა.
ნაცვლიშვილის თქმით, მმართველი პარტია იტყუება, როდესაც ამბობს, რომ აქვთ კარგი სისტემა და ოპოზიციას არ წარუდგენია, როგორ უნდა გახდეს სასამართლო უკეთესი. მისივე თქმით, ლელომ და სტრატეგია აღმაშენებელმა ასეთი კანონპროექტი წარადგინეს, რომელიც ქართულმა ოცნებამ არ განიხილა.
დეპუტატები აცხადებენ, რომ ისინი პროცესში მონაწილეობას არ მიიღებენ მანამ, სანამ ის არ გახდება ლეგიტიმური.
პარლამენტმა უზენაესი სასამართლოს 4 მოსამართლე უვადოდ დაამტკიცა. კენჭი უყარეს გენადი მაკარიძეს, თამარ ოქროპირიძეს, ნინო სანდოძეს და თეა ძიმისტარაშვილს დანიშვნას. მაკარიძეს, ოქტოპირიძესა და ძიმისტარაშვილს მხარი დაუჭირა 81-მა დეპუტატმა, ნინო სანდოძეს კი — 80-მა. ოთხივე მათგანის არჩევის წინააღმდეგი 5 დეპუტატი იყო.
პარლამენტში უზენაესი სასამართლოს კანიდატების მოსმენას ევროკავშირის ელჩი არ დაესწრო და თქვა, რომ მოსამართლეთა არჩევის პროცესი არ არის შესაბამისობაში შარლ მიშელის შეთანხმებასა და მაკროფინანსური დახმარების მიღების სანაცვლოდ წაყენებულ პირობებთან. პროცესს გამოეხმაურა აშშ-ის საელჩოც. ისინი წუხდნენ, რომ მოსამართლეების დანიშვნა იუსტიციის უმაღლესი საბჭოს არამოსამართლე წევრების მონაწილეობის გარეშე მიმდინარეობს.
აღსანიშნავია, რომ, შარლ მიშელის შეთანხმების ერთ-ერთი მთავარი პუნქტი სასამართლო რეფორმას ეხებოდა. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეეკავებინათ. ამის მიუხედავად, პარლამენტმა სასამართლოს მოსამართლეობის 6 კანდიდატი უვადოდ დაამტკიცა. პარალელურად კი, ქართული ოცნება აცხადებდა, რომ შარლ მიშელის დოკუმენტი მათი მხრიდან სრულდება. იმის საილუსტრაციოდ, რომ შეთანხმებაში ნამდვილად ეწერა უზენაესი სასამართლოს მოსამართლეების დანიშვნებისგან თავის შეკავების შესახებ, ამერიკის საელჩომ ტვიტერზე გამოაქვეყნა დოკუმენტის ფოტო, სადაც შეთანხმების ეს ნაწილი ყვითლად არის გახაზული.
ამის შემდეგ იყო ევროკავშირის წარმომადგენლის განცხადება იმის შესახებ, რომ საქართველომ მაკროფინანსური დახმარების მიღების პირობები ვერ შეასრულა. ჟულიენ კრამპის თქმით, ამ განცხადებამდე ქართული ოცნების ხელისუფლება აქტიურად საუბრობდა იმაზე, რომ ევროკავშირისგან მაკროფინანსური დახმარების მეორე ნაწილზე უარს ამბობენ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა აღარ არის.
ამასთანავე, ეუთოს დემოკრატიული ინსტიტუტებისა და ადამიანის უფლებათა ოფისის (ODIHR) მიერ გამოქვეყნებული ანგარიშის მიხედვით, საქართველოს უზენაესი სასამართლოს მოსამართლეობის კანდიდატების წარდგენის პროცესში გამოვლენილმა ხარვეზებმა ქვეყანაში სასამართლო სისტემის დამოუკიდებლობის საკითხი რისკის ქვეშ დააყენა.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები