დეპუტატი იაგო ხვიჩიას თქმით, მიხეილ სააკაშვილს შეეძლო 2007 წლის 7 ნოემბერს განვითარებული მოვლენებზე გავლენა მოეხდინა. ასე გამოეხმაურა ის ექსპრეზიდენტის განცხადებას, რომ 7 ნოემბრის მოვლენებს ის ტელევიზორიდან უყურებდა და ინსტრუქციებს არ გასცემდა.

"მე 7 ნოემბერს ვცხოვრობდი საქართველოში, ვიცი, იმ პერიოდში რა გავლენები ჰქონდა სააკაშვილს და ვიცი ისიც, რომ მას რომ დაერეკა, პირობითად, ტელევიზორიდან თუ უყურებდა ამ ამბავს და ეთქვა, რომ ასე არა, სხვანაირად მოიქეცითო, სხვანაირად მოხდებოდა ამბავი. ამისი მჯერა შინაგანად", — განაცხადა ხვიჩიამ იმედთან საუბრისას.

ის გამოეხმაურა სააკაშვილის ბოდიშსაც, რომელიც მან იმისთვის მოიხადა, რომ დამოუკიდებელი სასამართლო ვერ შექმნა. ხვიჩია ფიქრობს, რომ ეს პოზიცია არა ხალხის, არამედ საკუთარი თავისა და თანამებრძოლების მიმართ ბოდიში იყო.

"სინანული დავინახე სასამართლოზე, ოღონდ იმიტომ, რომ მას და მის თანამებრძოლებს შეეხოთ ეს ამბავი და არა იმიტომ, რომ ხალხს შეეხო ცუდად. ხალხთან ბოდიში კი არ იყო, საკუთარ თავთან და თანამებრძოლებთან ბოდიშს უფრო წააგავდა ეს პოზიცია", — ამბობს ხვიჩია.

29 ნოემბერს, საკუთარ სასამართლო სხდომაზე 7 ნოემბრის საქმეზე საუბრისას, მიხეილ სააკაშვილმა განაცხდა, რომ სამართალდამცავებს ინსტრუქციებს არ გასცემდა და აქციას ტელევიზორიდან უყურებდა.

"ისინი ასრულებდნენ მოვალეობას, როგორც მათ ესმოდათ და როგორი გამოცდილებაც ჰქონდა ჩვენს პოლიციას, რომელიც იყო მაშინ ძალიან ახალგაზრდა და ძალიან გამოუცდელი", — განაცხადა მან.


29 ნოემბერს მიხეილ სააკაშვილის სასამართლო პროცესი გაიმართა. მოსამართლეთა კოლეგიამ 7 ნოემბრის საქმე განიხილა. ექსპრეზიდენტი საკუთარ სასამართლო სხდომას პირველად დაესწრო და მას სიტყვით გამოსვლის უფლებაც მისცეს. სააკაშვილმა სხვადასხვა პოლიტიკურ თემაზე, მათ შორის, საქართველოში ჩამოსვლასა და შიმშილობაზე, გლდანის ციხეში იძულებით გადაყვანასა და მკურნალობაზე ისაუბრა. ასევე, მიმოიხილა მის მიმართ წაყენებული ბრალდებები. სასამართლო პროცესზე სიტყვით გამოსვლის შემდეგ, სააკაშვილმა დარბაზი დატოვა და სხდომა მის გარეშე გაგრძელდა.

პროცესის მეორე ნაწილში მხარეებმა უკვე კონკრეტულ მტკიცებულებებზე იმსჯელეს. დაცვის მხარემ დააყენა შუამდგომლობა ექსპრეზიდენტისთვის სატელეფონო საუბრების უფლების აღდგენის შესახებ, თუმცა სასამართომ შუამდგომლობა საერთოდ არ განიხილა. მიხეილ სააკაშვილის ადვოკატების შეფასებით, ეს გადაწყვეტილება სასამართლოს მხრიდან მართლმსაჯულების განხორციელებაზე უარის თქმაა.