ბესიკ თამლიანი სისხლის სამართლის კოდექსის მუხლითაა დაკავებული. როგორც შინაგან საქმეთა სამინისტროში On.ge-ს განუცხადეს, მას ბრალად 353-ე მუხლით გათვალისწინებული დანაშაული ედება, რაც პოლიციისადმი წინააღმდეგობას, მუქარას ან ძალადობას გულისხმობს.

თამლიანი გუშინ თბილისის საქალაქო სასამართლოსთან, მიხეილ სააკაშვილის მხარდამჭერ აქციაზე დააკავეს. ჯამში, დაკავებულია 15 ადამიანი. აქციაზე იყო დაპირისპირება მონაწილეებსა და სამართალდამცავებს შორის, რა დროსაც რამდენიმე პირი შეუძლოდ გახდა, მათ შორის ოპერატორები. სასამართლოს ეზოში, სავარაუდოდ, წიწაკის სპრეიც გამოიყენეს.

29 ნოემბერს აქციის პარალელურად, ექსპრეზიდენტის სასამართლო პროცესი მიმდინარეობდა, რომელსაც თავად სააკაშვილიც ესწრებოდა. ამ სხდომამდე სააკაშვილს სამჯერ უთხრეს უარი საკუთარ პროცესზე დასწრებაზე, მიზეზად იუსტიციის სამინისტრო მისი ჯანმრთელობის მდგომარეობას და უსაფრთხოებას ასახელებდა. საერთაშორისო პარტნიორები, უფლებადამცველები, ომბუდსმენი, ელჩები და არასამთავრობო ორგანიზაციები აცხადებდნენ, რომ სააკაშვილს არ უნდა შეეზღუდოს საკუთარ სხდომაზე დასწრების უფლება.

გუშინდელ სხდომაზე ექსპრეზიდენტს სიტყვით გამოსვლის უფლება მისცეს — მან სხვადასხვა პოლიტიკურ თემაზე, მათ შორის, საქართველოში ჩამოსვლასა და შიმშილობაზე, გლდანის ციხეში იძულებით გადაყვანასა და მკურნალობაზე ისაუბრა. სასამართლო პროცესზე სიტყვით გამოსვლის შემდეგ, სააკაშვილმა დარბაზი დატოვა და სხდომა მის გარეშე გაგრძელდა.

გაიგეთ რაზე ისაუბრა სააკაშვილმა სასამართლო სხდომაზე: