მადონა ინსტაგრამის სიშიშვლის ცენზურას აკრიტიკებს, რადგან აპლიკაციამ მის მიერ გამოქვეყნებული ფოტო ავტომატურად წაშალა, რომელშიც მომღერლის კერტი ჩანდა.

ამის შემდეგ მადონამ იგივე ფოტო, მაგრამ უკვე სხეულის ნაწილების ცენზურის შესაბამისად გადაფარვით, ასეთი ტექსტით თავიდან ატვირთა: "იმ ფოტოებს თავიდან ვაქვეყნებ, რომლებიც ინსტაგრამმა გაფრთხილებისა და შეტყობინების გარეშე წაშალა".

მადონას წარმომადგენლებს, რომლებიც მომღერლის თქმით, გვერდს არ მართავენ, ინსტაგრამმა განუცხადა, რომ სურათები ძუძუსთავების "მცირე ნაწილის" გამოჩენის გამო წაიშალა.

"ჩემთვის ჯერ კიდევ გასაკვირია, რომ იმ კულტურაში ვცხოვრობთ, რომელიც ქალის სხეულის თითოეული სანტიმეტრის ჩვენებაზე თანახმაა, გარდა კერტებისა. თითქოს ეს ქალის ანატომიის ერთადერთი ნაწილი იყოს, რომლის სექსუალიზებაც შეიძლება. თან ძუძუსთავის, რომელიც ბავშვს კვებავს", — ასეთ პასუხს სცემს მომღერალი ინსტაგრამის განმარტებას.

"კაცის კერტი რატომ არ ითვლება ეროტიკულად? და ქალის უკანალზე რას ვიტყვით? რომელსაც რატომღაც ცენზურა არ ეხება", — დასძინა მადონამ და გამოეხმაურა გენდერული დისკრიმინაციის შესახებ იმ ბრალდებებს, რომეთსაც #freethenipple აქტივისტები წლების განმავლობაში ავრცელებდნენ.

"ჩვენ იმ მასალას ვშლით, რომელიც ჩვენს წესებს არღვევს და არ აქვს მნიშვნელობა, ვინ გამოაქვეყნებს მას. იმის მიუხედავად, რომ გვესმის, ყოველთვის ყველა არ დაეთანხმება ჩვენს წითელ ხაზებს, წესები იმისთვისაა შექმნილი, რომ ნებისმიერი ასაკის ადამიანმა ჩვენს აპლიკაციაში თავი უსაფრთხოდ იგრძნოს", — განაცხადა ინსტაგრამის მფლობელი კომპანიის, Meta-ს წარმომადგენელმა.

წლის დასაწყისში ინსტაგრამი იძულებული გახდა, რომ ბოდიში მოეხადა პედრო ალმოდოვარის ფილმის Parallel Mothers-ის პოსტერზე დაწესებული ცენზურის გამო, რომელზეც ლაქტაციის მომენტშია კერტი გამოსახული. ფილმის შემთხვევაში ინსტაგრამმა ფოტო აღადგინა და თავისი გადაწყვეტილება იმით ახსნა, რომ ეს "მკაფიოდ მხატვრული კონტექსტია".

ასევე იხილეთ: