პედრო ალმოდოვარის ახალ ფილმს, Madres Paralelas (ერთნაირი დედები), რომელიც ბიენალეს გახსნის, ყურადღება დაანონსების დღიდან არ მოჰკლებია, თუმცა ამჯერად განხილვის თემად სულ სხვა კუთხით იქცა. საქმე იმაშია, რომ ფეისბუქის პლატფორმა ინსტაგრამმა სოციალური მედიიდან ფილმის პოსტერი წაშალა, რომელიც კერტს ლაქტაციის მომენტში გამოხატავს. ინსტაგრამმა პოსტის წაშლის მიზეზად სიშიშვლე დაასახელა, რაც მის წესებს ეწინააღმდეგება. ცნობილია, რომ ინსტაგრამი ქალის ძუძუსთავის ამსახველ პოსტებს პლატფორმიდან შლის, როცა იგივეს კაცის შიშველ მკერდზე არ აკეთებს.

თუმცა, კრიტიკის შემდეგ ინსტაგრამმა ფილმის პოსტერის წაშლილი პოსტები აღადგინა და ბოდიში მოიხადა.

"ჩვენ გამონაკლისებს ვუშვებთ, როდესაც საქმე სიშიშვლეს ეხება. ეს გამონაკლისები მაშინ ხდება, როდესაც ფოტოს კონტექსტი ცალსახად ხელოვნებასთანაა დაკავშირებული. აქედან გამომდინარე პედრო ალმოდოვარის ფილმის პოსტერი ფეისბუქზე აღვადგინეთ და ვწუხვართ, რომ დაბნეულობა გამოვიწვიეთ", — ეწერა განცხადებაში, რომელიც ინსტაგრამმა Associated Press-ს გაუგზავნა.

ფილმის პოსტერის დიზაინერი, ხავიერ ჯეანი AP-სთან აცხადებს, რომ ისიც და ალმოდოვარიც წინასწარვე ვარაუდობდნენ ვიზუალზე სოციალური გიგანტის რეაქციას. თუმცა, გადაწყვიტეს, რომ საკუთარი იდეებისთვის არ ეღალატათ.

"პედრომ მითხრა, რომ ფილმებისთვის პოსტერებს მთელი ცხოვრება, ინსტაგრამის არსებობამდეც აკეთებდა და ამ საქმიანობის გაგრძელებას მომავალშიც აპირებს", — თქვა დიზაინერმა.

ფილმში მთავარ როლს ალმოდოვარის დიდი ხნის მუზა, პენელოპე კრუზი ასრულებს. მასთან ერთად ფილმში თამაშობს ამ ესპანელი ხელოვანის შემოქმედებიდან ცნობილი კიდევ ერთი მსახიობი — როსი დე პალმა.

ფოტო: El Deseo

ასევე იხილეთ: