კომპანია Intrro-მ $2,2 მილიონის ღირებულების ახალ ინვესტიცია მოიზიდა. საუბარია გერმანელ და ამერიკელ ინვესტორებზე, რომლებმაც სტარტაპის სამომავლო გეგმები დააფინანსეს.

Intrro საერთაშორისო სტარტაპია, რომელიც ნასერ ოჯიდანმა და ნილ ჯეი შაჰმა 2020 წელს დააარსეს. კომპანია სამსახურის მაძიებლებს დამსაქმებლებს რეფერალური სისტემით აკავშირებს. აქ იგულისხმება შემდეგი: ახალი კადრების მოძიების პროცესში თავად კომპანიის თანამშრომლები არიან ჩართულები, რის სანაცვლოდაც ისინი კონკრეტულ ბენეფიტებს იღებენ.

კომპანია Intrro-ში ამბობენ, რომ $2,2 მილიონიანი ინვესტიცია Intrro-სადმი ერთგვარი ნდობის გამოცხადებაა და რაც მთავარია, რესურსი, რომელიც დაეხმარებათ მათი მისიის შესრულებაში, რაც დასაქმების პროცესის გაუმჯობესებას გულისხმობს.

კომპანიის დამფუძნებლებმა ჯერ კიდევ 2020 წელს აღმოაჩინეს, რომ განაცხადების მხოლოდ 7% მოდის რეფერალებიდან, თუმცა დაქირავებულთა 30%-ზე მეტი რეფერალის საფუძველზე აიყვანეს. სწორედ მაშინ გაჩნდა Intrro-ს შექმნის იდეა.

"ჩვენ გამოვკითხეთ 200-ზე მეტი პროგრამული უზრუნველყოფის ინჟინერი თბილისში. ისეთ პატარა ქვეყანაში, სადაც 3,9 მილიონი ადამიანი ცხოვრობს, რეფერალები დნმ-ის ნაწილია. გაგვიმართლა, რომ სწორედ აქ შევხვდით ჩვენს დამფუძნებელ ინჟინერს და ტექნოლოგიების მთავარ ოფიცერს, ვასილ რეხვიაშვილს, დანარჩენი კი ისტორიაა", — ამბობს ნასერ ოჯიდანი.

Intrro-ში ამბობენ, რომ კომპანიას დაფუძნებიდან დღემდე შემოსავალი 20-ჯერ გაეზარდა. ყველაფერი კი 500 Global-ში მონაწილეობით დაიწყო. ნასერ ოჯიდანის თქმით, ისეთი პროექტები, როგორიცაა 500 Global, მნიშვნელოვნად უწყობს ხელს სტარტაპების განვითარებას და ეკონომიკურ წინსვლას. კომპანიის დამფუძნებლების თქმით, გამოცდილება, რაც პროექტში ჩართულობით მიიღეს, მათთვის ძალიან ღირებულია.

"500 Global-ის მენტორების ხელმძღვანელობით, ჩვენი გუნდი ყველაზე მნიშვნელოვან საკითხებზე ფოკუსირდა და გაზომვადი შედეგებიც მივიღეთ. ამასთან, ბანკის მხარდაჭერით, ბრენდინგისა და მარკეტინგული აქტივობების ხარჯზე საქართველოს მასშტაბით საუკეთესო ტალანტების მოზიდვაც შევძელით", — ამბობს ოჯიდანი.

Intrro-ს დამფუძნებელი სამომავლო გეგმებზეც გვესაუბრება და ამბობს, რომ კომპანია მოზიდულ ინვესტიციას საქართველოში მსოფლიო დონის ნომერ პირველ საინჟინრო კომპანიის შექმნას მოახმარს. ამჟამად კომპანიის გუნდი 13 ქართველი წევრისგან შედგება.

კომპანიაში ამბობენ, რომ Intrro დიდწილად იმ გამოუყენებელ შესაძლებლობას ეფუძნება, რომელიც ორგანიზაციების კოლექტიური ქსელის მონაცემებში იმალება და მიზნად მათ ღირებულ პროდუქტებად გარდაქმნას ისახავს. კომპანიის რეფერალური სისტემა მთელი მსოფლიოს მასშტაბით აძლევს მომხმარებელს შესაძლებლობას, ჰქონდეთ წვდომა საუკეთესო ტალანტებზე, მიიღონ ინფორმირებული გადაწყვეტილებები თანამშრომელთა აყვანისას და შექმნან მრავალფეროვანი გუნდები.

აღსანიშნავია, რომ Intrro 500 Georgia-ს ფინალისტია — წელს აქსელერაციის ეს პროგრამა საქართველოს ბანკის, საქართველოს ინოვაციებისა და ტექნოლოგიების სააგენტოსა და 500 Global-ის მხარდაჭერით განხორციელდა.