რუსეთში, ციმბირის შახტში მომხდარ უბედურ შემთხვევას სულ მცირე 46 მეშახტე და 6 მაშველი ემსხვერპლა. ათობით ადამიანი უგზო-უკვლოდ დაკარგულად ითვლება. შახტი, რომელი ქალაქ ბელოვოს მახლობლად, კემეროვოს რეგიონში მდებარეობს, კვამლით 25 ნოემბერს, გამთენიისას გაივსო. კვამლი ზედაპირზე 250 მეტრზე გავრცელდა. შიგნით 285 ადამიანი იმყოფებოდა.

მანამდე კემეროვოს გუბერნატორმა სერგეი ცივილევმა Telegram-ზე დაწერა, რომ ევაკუაციის მიუხედავად, შიგნით სულ მცირე 35 ადამიანი რჩებოდა.

ქვანახშირის მწარმოებელი რეგიონ კემეროვოს შახტში, რომელიც მოსკოვის აღმოსავლეთით, დაახლოებით, 3 500 კილომეტრის დაშორებით მდებარეობს, ფატალური შემთხვევები წლების განმავლობაში ხდებოდა.

Aljazeera-ს თანახმად, 2016 წელს 36 მეშახტე დაიღუპა რუსეთის შორეულ ჩრდილოეთში მდებარე ნახშირის შახტში მეთანის აფეთქებების სერიის შედეგად. ინციდენტის შემდეგ, ხელისუფლებამ ქვეყნის 58 ქვანახშირის შახტის უსაფრთხოება შეამოწმა და 20 მათგანი პოტენციურად სახიფათოდ გამოაცხადა.

2010 წელს კიდევ ერთი ინციდენტის დროს ციმბირში, რასპადსკაიას შახტში 91 ადამიანი დაიღუპა, დაშავდა — 100. უბედური შემთხვევა მეთანის აფეთქებამ გამოიწვია, ამ დროს შიგნით 300-ზე მეტი მეშახტე იმყოფებოდა.

2007 წელს, ამავე რეგიონში, ულიანოვსკაიას შახტში გაზის აფეთქების შედეგად 110 ადამიანი დაიღუპა.