შრომის ინსპექციის განცხადებით, ვაკანსიები და შრომითი ურთიერთობები შეისწავლეს, რის შედეგადაც დისკრიმინაციული მოპყრობისა და სამსახურში შევიწროების ფაქტები დაადგინეს. უწყებაში აცხადებენ, რომ შესწავლა დაინტერესებული პირების მიმართვისა და ინსპექციის ინიციატივის საფუძველზე დაიწყეს.

მათივე ინფორმაციით, შეამოწმეს საჯაროდ გამოქვეყნებული 100 ვაკანსია და დაადგინეს, რომ დამსაქმებლების მხრიდან ადგილი ჰქონდა ასაკის, სქესის, გარეგნობისა და ა.შ. ნიშნით დისკრიმინაციას დასაქმების მსურველებთან მიმართებით. უწყება ამბობს, რომ დარღვევებს შორის იყო:

  • გაყიდვების კონსულტანტის პოზიციაზე განიხილება "სასიამოვნო გარეგნობის მდედრობითი სქესის" წარმომადგენლის კანდიდატურა;
  • სამზარეულოს თანამშრომლის პოზიციაზე — მდედრობითი სქესის წარმომადგენლის კანდიდატურა 18-50 წლის ჩათვლით;
  • ვაკანსია არ ეხებოდა ჭარბწონიან აპლიკანტებს, რადგან მათ მიერ ვერ მოხდებოდა მომხმარებლებისათვის ხარისხიანი სერვისის მიწოდება;
  • გაყიდვების კონსულტანტი გოგონა 18-დან 30 წლამდე და ა.შ.

უწყება განმარტავს, რომ დისკრიმინაცია არის ისეთი მოპყრობა ან პირობების შექმნა, რომელიც პირს, რაიმე ნიშნის მიხედვით, არახელსაყრელ მდგომარეობაში აყენებს ანალოგიურ პირობებში მყოფ სხვა პირებთან შედარებით, ან თანაბარ მდგომარეობაში აყენებს არსებითად უთანასწორო პირობებში მყოფ პირებს, რომელსაც არ აქვს ობიექტური და გონივრული გამართლება.

შრომის ინსპექციის განცხადებით, წინასახელშეკრულებო ეტაპზე დისკრიმინაციული მოპყრობა შემდეგი გარემოებებით შემოწმდა:

  • პირს ანალოგიურ პირობებში მყოფ სხვა პირთაგან განსხვავებულად ეპყრობიან;
  • განსხვავებული მოპყრობა პირს ზღუდავს ან ხელს უშლის შრომითი უფლებებით სარგებლობისას;
  • არ არსებობს განსხვავებული მოპყრობის კანონით განსაზღვრული, ლეგიტიმური მიზანი;
  • განსხვავებულ მოპყრობას არ აქვს ობიექტური და გონივრული გამართლება და იგი დასახული მიზნის არათანაზომიერია.

რაც შეეხება სამუშაო ადგილზე დასაქმებულის შევიწროებასთან დაკავშირებულ საკითხს, შრომის ინსპექციის ინფორმაციით, დაადგინეს დამსაქმებლის არასასურველი ქცევა, რომელიც მიზნად ისახავდა ღირსების შემლახველი, შეურაცხმყოფელი და დამამცირებელი გარემოს შექმნას.

"შრომით ურთიერთობებში დისკრიმინაციასთან ბრძოლის უპირველესი მიზანია საზოგადოების ყველა წევრს შეექმნას მუშაობისა და განვითარების თანაბარი შესაძლებლობები. ამრიგად, შრომის ინსპექცია მოუწოდებს დამსაქმებლებს არ დაუშვან დისკრიმინაცია შრომით ურთიერთობებში, რაც თანაბრად ვრცელდება შრომითი ურთიერთობების ყველა, მათ შორის, ვაკანსიის გამოცხადებისა და კანდიდატის აყვანის ეტაპებზე, რათა უკანონოდ არ შეეზღუდოთ სამუშაოზე წვდომა, ასევე განვითარება ადამიანთა გარკვეულ ჯგუფებს", — აცხადებენ უწყებაში.

უწყებაში ამბობენ, რომ ამ შესწავლის შემდეგ 15-მდე ორგანიზაცია გააფრთხილეს.