გირჩი — მეტი თავისუფლების წევრები სუს-ის შენობასთან სახელმწიფო უსაფრთხოების სამსახურის უფროსის, გრიგოლ ლილუაშვილის ნიღბებით მივიდნენ. ამ პერფორმანსით მათ პარტიის წევრის, რომა მახარაძის და სხვა აქტივისტების უსამართლო დაკავებები გააპროტესტეს.

"ლილუაშვილებს სუს-ის წინ არ იჭერენ", — აცხადებენ პარტიაში.

რომა მახარაძე ბათუმის სუს-ის შენობასთან პლაკატით დგომისა და მუსიკის ჩართვის გამო ორი დღით დააკავეს და 500-ლარიანი ჯარიმა გამოუწერეს. გირჩი — მეტი თავისუფლების გავრცელებული ვიდეოს მიხედვით, დღეს გამართული პერფორმანსისას პარტიის წევრებს სწორედ ეს მუსიკა ჰქონდათ ჩართული. სუს-ის შენობასთან მათ სამართალდამცავები დახვდნენ, თუმცა არცერთი მათგანი არ დაუკავებიათ.